اسلام آباد: وفاقی حکومت نے شوگر ملز کو چینی برآمد کی اجازت دینے کا فیصلہ کرلیا۔

حکومت اور شوگر ملز ایسوسی ایشن کے درمیان معاہدہ طے پاگیا ہے جب کہ شوگر ملز کو چینی برآمد کی اجازت دینے کا فیصلہ کیا گیا ہے۔

وفاقی وزیر رانا تنویر حسین کی صدارت میں شوگر ایڈوائزری بورڈ کا اجلاس ہوا جس میں حکومت اور شوگر ملز ایسوسی ایشن کے درمیان معاہدے پر دستخط کردیے گئے ہیں۔

حکومت نے ایک لاکھ 50 ہزار میٹرک ٹرن چینی برآمد کرنے کی مشروط اجازت دی ہے جب کہ فیصلہ کیا گیا ہے کہ چینی کے اسٹاک کی دستیابی اور قیمتوں میں استحکام کو یقینی بنایا جائے گا۔

فریقین نے اتفاق کیا کہ ایکس ملز چینی کی قیمت میں کسی صورت اضافہ نہیں کیا جائے گا، کاشتکاروں کی تمام زیر التواء ادائیگیاں ترجیحی بنیادوں پر ادا کی جائیں گی۔

رانا تنویر حسین کا کہنا ہے کہ ایڈوائزری بورڈ قیمتوں اور اسٹاک سے متعلق ہر پندرہ روزہ جائزہ لے گا، مستقبل میں چینی کی برآمد کا آپشن ملک میں قیمتوں کے استحکام اور اسٹاک کی دستیابی سے منسلک ہوگا۔