ویسٹ انڈیز کے سابق لیجنڈری کھلاڑی برائن لارا پاکستان کی بجائے امریکہ کے سپر 8 مرحلے میں کوالیفائی کرنے کے خواہشمند ہیں۔

حال ہی میں مقامی اسپورٹس چینل کو دیے گئے انٹرویو میں ویسٹ انڈیز کے سابق لیجنڈری کھلاڑی برائن لارا نے ٹی ٹوئنٹی ورلڈکپ کے سپر 8 مرحلے کے لیے پاکستان کی بجائے امریکہ کا انتخاب کیا ہے۔

برائن لارا کہتے ہیں ’’اگر اعداد و شمار کو دیکھیں تو پاکستان کے پاس اب بھی موقع موجود ہے لیکن میرے خیال میں امریکہ کو اپنے آخری میچ پر توجہ دینے کی ضرروت ہے‘‘۔

انہوں نے کہا ’’امریکہ کی ٹیم جیتنے اور کوالیفائی کرنے کی صلاحیت رکھتی ہے اور مجھے امید ہے کہ وہ یہ میچ جیت جائیں گے لہذا میری سپورٹ امریکہ کے ساتھ ہے‘‘۔

سابق لیجنڈری کھلاڑی کا کہنا تھا ’’مجھے لگتا ہے کہ امریکہ کی ٹیم پراعتماد ہے اور وہ سپر 8 مرحلے میں کولیفائی کرنا چاہتے ہیں اور اگر ایسا ہوا تو یہ امریکی کرکٹ کے لیے تاریخ ساز دن ہوگا‘‘۔

خیال رہے کہ پاکستان کرکٹ ٹیم کو ٹی ٹوئنٹی ورلڈکپ میں اب تک بھارت اور امریکہ کے خلاف دو میچز میں شکست کا سامنا کرنا پڑا ہے جب کہ پاکستان نے صرف کینیڈا کے خلاف فتح حاصل کی ہے۔

قومی ٹیم اپنا چوتھا گروپ میچ آئرلینڈ کے خلاف کھیلی گی جس میں رن ریٹ کو بہتر بنانے کے لیے پاکستان کو بڑے مارجن سے جیتنا ہوگا۔

تاہم قومی ٹیم کا سپر 8 مرحلے میں کوالیفائی کرنے کا امکان تب ہی ممکن ہے جب امریکہ کو آج آئرلینڈ کے خلاف شکست ہو ورنہ ورلڈکپ میں پاکستان کا سفر اختتام پذیر ہوجائے گا۔