امیر جماعت اسلامی حافظ نعیم الرحمن کا کہنا ہے کہ ہم احتجاج کے لیے ڈی چوک پر بھی جا سکتے ہیں۔

راولپنڈی میں جماعت اسلامی کے دھرنے کے شرکا سے خطاب کرتے ہوئے حافظ نعیم الرحمن کا کہنا تھا کہ کچھ لوگ پوچھتے ہیں یہ دھرنا کب تک چلے گا۔

ہم احتجاج کےلیےڈی چوک بھی جا سکتے ہیں، ساری ذمہ داری ن لیگ،پی پی اور ایم کیو ایم پر ہے، تاجر اور صنعت کار ہمارے رابطے میں ہیں۔

انہوں نے کہا کہ جلد ہی ملک گیر احتجاج کا اعلان کریں گے، اشیائے خورونوش، پٹرول کی قیمتیں بڑھنے سے سب پریشان ہیں، تنخواہ دار کا نیا سلیب قابل قبول نہیں۔

حافظ نعیم الرحمن کا کہنا تھا کہ 5 سے 20 ایکڑ زرعی زمین والوں سے ٹیکس نہ لیا جائے، 20 ایکڑ والوں پر معقول ٹیکس لگایا جائے.

ان کا کہنا تھا کہ دھرنے والوں کے پاس کسی بھی دن او روقت مارچ کا آپشن موجود ہے، ملک میں مہنگائی کاعذاب مسلط ہوچکا ہے، کیپسٹی چارجز کی مد میں اربوں روپے عوام کے لوٹے گئے ہیںَ.

امیرجماعت اسلامی نے ملک گیر پہیہ جام ہڑتال کاعندیہ دیتے ہوئے کہا کہ ہم ایک دن، ہفتہ اور پورے مہینے کے لیے پہیہ جام کی کال دے سکتے ہیں، ہم قومی شاہراؤں پر بھی دھرنا دے سکتے ہیں۔

انہوں نے کہا کہ وزیراعظم اعلان کریں کہ سرکاری گاڑی 1300 سی سی سے زیادہ نہ ہو، اس اقدام سے 250 سے 300 ارب روپے بچیں گے، آج یہ 1300 سی سی کی گاڑی میں کیوں نہیں بیٹھ سکتے۔

ہم بجلی کے بم برداشت کریں اور وزرا عیاشیاں کریں، اپنی مراعات کم کرو، مفت پٹرول نہیں ملے گا۔

امیر جماعت اسلامی حافظ نعیم الرحمن نے اپنے خطاب میں مزید کہا کہ یہ دھرنا قوم کو امید سے ہمکنار کرے گا، یہ تاریخی جدوجہد اپنی منزل کی جانب گامزن ہے۔