دریائے چناب میں مرالہ کے مقام پر 4 سے 7 جولائی کے دوران درمیانے سے اونچے درجے کے سیلاب کا خطرہ ہے۔

ترجمان پی ڈی ایم اے کے مطابق مرالہ کے مقام پر پانی کی سطح میں مسلسل اضافہ ہورہا ہے، پی ڈی ایم اے پنجاب نے دریائے چناب سے ملحقہ اضلاع کو الرٹ جاری کردیا ہے۔

ترجمان کا کہنا ہے کہ سیالکوٹ، گجرانوالہ، منڈی بہاؤالدین اور حافظ آباد کے ڈی سی الرٹ رہیں، چنیوٹ، جھنگ، خانیوال، مظفرگڑھ، ملتان اور راجن پورکے ڈی سی کو بھی الرٹ رہنے کی ہدایت کردی گئی ہے۔

ترجمان پی ڈی ایم اے نے بتایا کہ ڈی جی پی ڈی ایم اے نے متعلقہ انتظامیہ کو الرٹ رہنے کی ہدایات کی ہیں۔

ڈی جی پی ڈی ایم اے عرفان علی کاٹھیا نے کہا کہ ایمرجنسی کنٹرول رومز میں اسٹاف کو الرٹ رکھا جائے، ریسکیو 1122 کی ڈیزاسٹر رسپانس ٹیموں کو بھی ہائی الرٹ رکھا جائے۔

عرفان علی کاٹھیا مزید کہتے ہیں کہ دریاؤں کے کنارے موجود مکانوں اور مویشیوں کے انخلاء کو یقینی بنائیں، فلڈ ریلیف کیمپس میں صاف پانی ودیگرسہولیات کی فراہمی یقینی بنائی جائے۔