کراچی: آئی جی سندھ غلام نبی میمن کی زیرصدارت نجی سیکیورٹی کمپنی کے گارڈز کی تربیت کے حوالے سے اہم اجلاس منعقد۔

سینٹرل پولیس آفس کراچی میں منعقدہ اجلاس میں ڈی آئی جیز ہیڈ کوارٹرز، ایس ایس یو، ٹریننگ، انوسٹیگیشنز سمیت آل پاکستان سیکیورٹی ایجنسی کے چیئرمین میجرمنیر احمد، محکمہ داخلہ سندھ کے نمائندے اور دیگر پولیس افسران شریک ہوئے۔

اجلاس کے شرکاء کو ڈی آئی جی ایس ایس یو نے سندھ پرائیویٹ سیکورٹی ایجنسیز(ریگولیشن اینڈ کنٹرول) آرڈیننس 2000 اور نجی سیکیورٹی کمپنیوں کی موجودہ تعداد اور صورت حال پر تفصیلی بریفنگ دی۔

اجلاس کے دوران چیئرمین اپسا میجر منیر احمد نے کہا کہ ہم سندھ حکومت اور پولیس کے ساتھ مل کر نجی گارڈزکی ٹریننگ کے خواہ ہیں۔ نجی سیکیورٹی کمپنیوں کو قانون کے تحت ریگولیٹ ہونا چاہیے۔

آئی جی سندھ نے ڈی آئی جی ایس ایس یو کو ہدایت کی کہ ایس ایس پی (ایس ایس یو) کو سیکیورٹی کمپنی سے متعلق موجودہ قوانین پرعمل درآمد یقینی بنانے سے متعلق ذمہ داریاں تفویض کی جائیں۔

آئی جی سندھ نے کہا کہ ڈی آئی جی انوسٹیگیشن کی سربراہی میں اے آئی جی لیگل اور پرنسپل سعید آباد پولیس ٹریننگ کالج پر مشتمل کمیٹی تشکیل دی جائے۔

آئی جی سندھ کا کہنا تھا کہ کمیٹی سیکیورٹی کمپنیوں سے متعلق موجودہ قوانین، ایس اوپیز، آرڈیننس پر تحقیقات کرکے جامع تجاویز پیش کرے گی۔

غلام نبی میمن کہتے ہیں کہ نجی سیکیورٹی گارڈز کی تربیت اور معیار کو بہتربنانے کے لیے خصوصی ٹریننگ اسکول کی ضرورت ہے۔ عالمی معیاراوردنیا کی بیسٹ پریکٹیسز کے مطابق نجی سیکیورٹی گارڈز ٹریننگ اسکول قائم ہونا چاہیے۔

انہوں نے کہا کہ ڈی آئی جی ایس ایس یو ٹریننگ، پرنسپل رزاق آباد پولیس ٹریننگ کالج، اور ایس پی انیل حیدر پر مشتمل 4 رکنی کمیٹی تشکیل دی جائے۔

آئی جی سندھ کا مزید کہنا تھا کہ کمیٹی نجی سیکیورٹی گارڈز ٹریننگ اسکول قائم کرنے سے متعلق اپنی جامع سفارشات ترتیب دے گی۔ کمیٹی کالج کے لیے زمین کے تعین سے لے کر تربیتی نصاب اور دیگر سہولیات پر بھی تجاویز دے گی۔