امریکی ریاست ٹیکساس میں  خوفناک سمندری طوفان بیرل  کے باعث لاکھوں لوگ بجلی  سے محروم ہوگئے۔

بین الاقوامی خبررساں ادارے کے مطابق  ٹیکساس کے ساحلی علاقوں سے ٹکرانے والے خوفناک سمندری طوفان بیرل کے باعث ہیوسٹن میں 4 افراد  ہلاک  اور کئی زخمی ہوگئے۔

ایک شخص تیز ہواؤں کے باعث گرنے والے درخت کی زد میں آکر ہلاک ہوا جبکہ دوسرا شخص گھر پر گرنے والے درخت سے زمین بوس ہونے والی چھت کے ملبے کے تلے دب کر جان سے ہاتھ دھو بیٹھا۔

گزشتہ 12 گھنٹے سے ہیوسٹن اور اس کے اطراف کے شہروں میں تیز ہواؤں کے ساتھ بارشوں کا سلسلہ جاری ہے۔

شہر  کی سڑکیں اور نشینی علاقے زیر آب آگئے ہیں  اور متعدد علاقے ندی اور تالاب کا منظر پیش کرتے نظر آتے ہیں۔

شہر کے مختلف علاقوں میں 27 لاکھ  سے زائد افراد بجلی سے محروم ہیں اور ہزاروں افراد نے شیلٹر ہومز اور ہوٹلوں میں پناہ لے لی ہے۔

شہر بھر میں مختلف مقامات پر درخت گرے پڑے ہیں اور سینکڑوں مکانات کو نقصان پہنچا ہے۔خوفناک موسم کی وجہ سے 6 سو  سے زائد پروازیں منسوخ کردی گئی ہیں۔

شہری حکام نے امدادی آپریشن شروع کردیا ہے اور ٹریفک کے حادثات سے محفوظ رہنے کے لیے لوگوں کو گھروں تک محدود رہنے کی ہدایت کی ہے۔

شاہراؤں پر ٹریفک نہ ہونے کے برابر ہے جبکہ شہر میں کاروبار زندگی بند ہے۔