ورلڈ چیمپئن شپ آف لیجنڈز کے پہلے سیمی فائنل میں پاکستان چیمپئنز نے ویسٹ انڈیز چیمپئنز کو شکست دے کر فائنل کے لیے کوالیفائی کرلیا ہے۔

ورلڈ چیمپئن شپ آف لیجنڈز کا پہلا سیمی فائنل نارتھ مپٹن میں کھیلا گیا جس میں ویسٹ انڈیز چیمپئنز نے ٹاس جیت کر پہلے فیلڈنگ کرنے کا فیصلہ کیا۔

پاکستان چیمپئنز نے پہلے بیٹنگ کرتے ہوئے 8 وکٹوں کے نقصان پر 199 رنز کا ہدف دیا جس کے جواب میں ویسٹ انڈیز کی پوری ٹیم 19.5 اوورز میں 178 رنز پر ڈھیر ہوگئی۔

پاکستان چیمپئنز نے 20 رنز سے کامیابی حاصل کرکے فائنل کے لیے کوالیفائی کرلیا ہے جب کہ فائنل میں پاکستان چیمپئنز کا مقابلہ بھارت اور آسٹریلیا کے درمیان کھیلے جانے والے دوسرے سیمی فائنل کی فاتح ٹیم سے ہوگا۔

پاکستان چیمپئنز اننگز

پاکستان چیمپئنز کی جانب سے یونس خان 65 رنز بناکر نمایاں اسکورر رہے جب کہ کامران اکمل نے 46 رنز کی اننگز کھیلی، سہیل تنویر 33 رنز بناکر رن آؤٹ ہوئے اور عامر یامین 40 رنز کے ساتھ ناقابل شکست رہے۔

ویسٹ انڈیز چیمپئنز کی جانب سے فڈل ایڈورڈز نے 3 کھلاڑیوں کو آؤٹ کیا جب کہ سلیمان بین نے 2، جیروم ٹیلر اور ڈیوائن اسمتھ نے 1،1 وکٹ حاصل کی۔

ویسٹ انڈیز چیمپئنزاننگز

ویسٹ انڈیز چیمپئنز کی جانب سے ایشلے نرس نے سب سے زیادہ 36 رنز اسکور کیے جب کہ رایاض ایمرٹ 29، ڈیوائن اسمتھ 26، کرس گیل 22 اور چیڈوک والٹن 19 رنز بناکر آؤٹ ہوئے۔

پاکستان چیمپئنز کی جانب سے سہیل خان نے 4 کھلاڑیوں کو آؤٹ کیا، وہاب ریاض اور شعیب ملک نے 2،2 وکٹیں حاصل کیں۔