اسلام آباد: ڈسٹرکٹ اینڈ سیشن کورٹ نے پی ٹی آئی رہنما رؤف حسن سمیت دیگر 9 کارکنان کا تین روزہ جسمانی ریمانڈ منظور کرلیا۔

ڈسٹرکٹ اینڈسیشن کورٹ اسلام آباد میں جوڈیشل مجسٹریٹ شبیر بھٹی نے رؤف حسن سمیت دیگر تحریک انصاف کے 9 کارکنان کا تین روزہ جسمانی ریمانڈ منظور ہونے کا حکم نامہ جاری کردیا۔

حکم نامے کے مطابق رؤف حسن و دیگر ملزمان کا اس سے قبل دو روزہ جسمانی ریمانڈ منظور ہوا،  تفتیشی افسر نے سوشل میڈیا اکاؤنٹس کی ریکوری کے لیے جسمانی ریمانڈ مانگا ہے۔

حکم نامے میں کہا گیا ہے کہ تفتیشی افسر کے مطابق ملزمان کی دیگر تحریک انصاف کی سوشل میڈیا ٹیم سے وابستگی کی بھی تفتیش کرنی ہے، ملزمان کے ذریعے ان ہی سوشل میڈیا پر سرگرمیوں کی بھی رپورٹ بنانی ہے۔

حکمنامے میں مزید کہا گیا ہے کہ اسلام آباد ہائیکورٹ کے حکم کے مطابق ملزم سے تفصیلی اور جامع تفتیش ہونی چاہیے لہذا تفتیش کے لیے رؤف حسن و دیگر ملزمان کا تین روزہ جسمانی ریمانڈ منظور کیا جاتا ہے جب کہ رؤف حسن و دیگر ملزمان کو 27 جولائی کو عدالت میں پیش کیا جائے۔