نئی دہلی: بھارتی شہر ممبئی میں 300 ملی میٹر ریکارڈ بارش کے باعث ڈیزاسٹر ریلیف فورس کو تعینات کرنے کا فیصلہ کیا گیا ہے۔

بھارتی میڈیا کے مطابق ممبئی میں گزشتہ 6 گھنٹوں کے دوران 300 ملی میٹر بارش نے نظام درہم برہم کردیا ہے جب کہ ممبئی میں شدید بارشوں کے باعث سیلابی صورت حال کا سامنا ہے۔

رپورٹ کے مطابق ممبئی میں رات گئے بارش شروع ہوئی جو صبح تک جاری رہی، شدید بارشوں سے سڑکوں اور ریلوے ٹریکوں پر پانی جمع ہونے سے ٹرانسپورٹ کی سہولیات بھی متاثر ہیں۔

مقامی انتظامیہ کے مطابق ممبئی ایئرپورٹ پر 30 پروازیں منسوخ اور 250 سے زائد تاخیر کا شکار ہیں۔

بھارتی محکمہ موسمیات کے مطابق آنے والے گھنٹوں میں ممبئی میں مزید تیز بارش متوقع ہے جس کے باعث شہریوں کو گھروں تک محدود رہنے کی ہدایت کی گئی ہے۔