کراچی: شہر قائد میں بحریہ ٹاؤن تا نمائش چورنگی ماحول دوست الیکٹرک بس کا نیا روٹ ای وی-4 شروع ہوگیا۔

سندھ کے سینئر وزیر شرجیل انعام میمن کی کاوشوں سے کراچی میں بحریہ ٹاؤن تا نمائش چورنگی  ماحول دوست الیکٹرک بس کا نیا روٹ ای وی-4 شروع ہوگیا ہے۔

پیپلز پارٹی کے ایم پی اے راجہ عبدالرزاق، ساجد جوکھیو، بحریہ ٹاؤن  کے اسیس جی ایم برگیڈیئر خالد محمود نے  بحریہ ٹاؤن میں الیکٹرک بس کے نئے روٹ کا  افتتاح کیا۔

ای وی-4 روٹ 55 کلومیٹر طویل ہوگا جس پر 12 الیکٹرک بسیں چلیں گی، نئے روٹ سے بحریہ ٹاؤن، دنبہ گوٹھ، گلشن معمار، سہراب گوٹھ  اور الآصف اسکوائر، عائشہ منزل، لالو کھیت اور تین ہٹی کے عوام مستفید ہوسکیں گے۔

الیکٹرک بسں کے نئے روٹ سے مقامی معیشتوں کو فروغ ملے گا، لوگوں کو روزگار کی تلاش میں آسانی ہوگی جب کہ لوگوں کے سفری اخراجات اور سڑکوں پر ٹریفک کے دباؤ میں بھی کمی آئے گی۔

محکمہ ٹرانسپورٹ حکومت سندھ شہریوں کو بہترین، سستی اور جدید سفری سہولیات کی فراہمی   کے لئے مزید بسز لئے گی اور نئے روٹس متعارف کروائے گی۔