عمان کے علاقے وادی الکبیر کی امام علی مسجد میں مجلس کے دوران دہشتگردوں کے حملے کے نتیجے میں 5 افراد جاں بحق ہوگئے جس میں 2 پاکستانی بھی شامل ہیں۔

غیر ملکی خبررساں ادارے کے مطابق عمان کے دارالحکومت مسقط میں وادی الکبیر کی امام علی مسجد میں نامعلوم افراد کی جانب سے فائرنگ کی گئی، جس کے نتیجے میں 5 افراد جاں بحق اور 15 زخمی ہوگئے۔

دہشتگردوں کے حملے کے دوران مسجد میں مجلس عزا جاری تھی، جس میں 700 سے زائد افراد موجود تھے، جن میں زیادہ تر پاکستانی شامل ہیں۔

رائل عمان پولیس نے بتایا کہ وادی الکبیر کے علاقے میں ایک مسجد پر فائرنگ کی اطلاعات ملی ہیں جس میں ابتدائی طور پر 5 افراد کے جاں بحق اور درجنوں زخمی ہونے کی اطلاعات موصول ہوئی ہیں۔

پولیس کی جانب سے جاری بیان میں کہا گیا کہ صورتحال سے نمٹنے کے لیے تمام ضروری حفاظتی اقدامات اور طریقہ کار اختیار کیے گئے ہیں، جب کہ واقعے کی تحقیقات کی جارہی ہیں اور شواہد اکھٹے کیے جارہے ہیں۔

دوسری جانب دفتر خارجہ نے عمان کے دارالحکومت مسقط میں عزاداری کی مجلس پر ہونے والے حملے میں 4 پاکستانی جاں بحق ہونے کی تصدیق کردی۔

ترجمان دفتر خارجہ نے بتایا کہ وادی کبیر میں واقع علی ابن ابی طالب مسجد میں فائرنگ کا واقع پیش آیا، انہوں نے بتایا کہ فائرنگ میں 4 پاکستانی جاں بحق اور 13 زخمی ہوئے جن کا ہسپتال میں علاج جاری ہے۔