فلپائن میں منیلا کے خلیج کے ساحل پر ڈوبنے والے بحری آئل ٹینکر سے تیل کا اخراج قریبی ماہی گیروں کے گاؤں کے ساحل تک پہنچ گیا ہے۔

سمندری ٹینکر 1.5 ملین لیٹر صنعتی ایندھن لے کر جا رہا تھا جب یہ لیمے کے ساحل کے قریب سمندر میں ڈوب گیا، سمندری سطح پر تیل کی موجودگی سے آبی حیات سمیت ماہی گیروں کی صحت اور معاش کو خطرہ لاحق ہو گیا ہے۔

فلپائن کے دارالحکومت کے مغرب میں واقع صوبے باتان کے لیمے کے ساحل کے قریب سمندر میں 15 لاکھ لیٹر صنعتی ایندھن لے کر جا رہا آئل ٹینکر ایم ٹیرا نووا ڈوب گیا تھا۔ اس حادثے میں عملے کے 17 ارکان میں سے ایک ہلاک ہو گیا تھا۔

منیلا کے جنوب میں واقع کیویٹ صوبے کے قصبے تنزا کے ماہی گیر اس وقت پریشان ہو گئے جب تیل کی چادر شہر کے ساحلوں پر چھا گئی، انہوں نے حکام کو شدید بدبو کی بو آنے کی اطلاع دی۔

فلپائن کے کوسٹ گارڈ نے کہا ہے کہ اس نے ڈوبنے والے ٹینکر سے رساؤ کو سیل کر دیا ہے اور مزید ایندھن کے اخراج کو روکنے کے لئے تیل کو باہر نکالنا شروع کر دیا جائے گا۔

حکام اس بات کی تحقیقات کر رہے ہیں کہ آیا ڈوبنے کا تعلق طوفان گیمی سے ہے، جس نے فلپائن میں مون سون کی بارشوں میں شدت پیدا کی، جس کے نتیجے میں سیلاب اور لینڈ سلائیڈنگ ہوئی جس میں کم از کم 36 افراد ہلاک ہو گئے۔

گزشتہ سال فروری میں 8 لاکھ لیٹر صنعتی ایندھن لے جانے والے ٹینکر ایم ٹی پرنسس ایمپریس سے تیل کے اخراج کی وجہ سے اس کی صفائی میں تین ماہ لگے تھے جس سے سیاحتی شہر متاثر ہوئے تھے۔