آئی ایس پی آر کا کہنا ہے کہ بلوچستان کے مختلف علاقوں میں دہشت گردوں نے بزدلانہ حملے کیے۔

پاک فوج کے شعبہ تعلقات عامہ (آئی ایس پی آر) کے مطابق فورسز نے دہشت گردوں کے مذموم عزائم کو کامیابی کیساتھ ناکام بنایا۔

سیکیورٹی فورسز کی جوابی کارروائی میں 21 دہشت گرد ہلاک جہنم واصل ہو گئے جبکہ آپریشن کے دوران 14 جوانوں نے جام شہادت نوش کیا۔

آئی ایس پی آر کے مطابق پاک فوج کے 10 اور دیگر قانون نافذ کرنے والے اداروں کے 4 اہلکار شہید ہوئے۔

آئی ایس پی آر کا کہنا تھا کہ 25،26 اگست کی رات دہشت گردوں نے بلوچستان کے مختلف علاقوں میں حملے کیے، موسیٰ خیل میں دہشت گردوں نے بس کو روکا اور معصوم شہریوں کو نشانہ بنایا۔

آئی ایس پی آر کے مطابق بزدلانہ کارروائیوں میں موسیٰ خیل، قلات اور لسبیلہ میں شہریوں کو نشانہ بنایا گیا، دہشت گردوں کا مقصد بلوچستان کے پُرامن ماحول اور ترقی کو متاثر کرنا تھا۔

آئی ایس پی آر کا مزید کہنا تھا کہ دہشت گردوں کی پشت پناہی کرنے والوں کو انصاف کے کٹہرے میں لایا جائے گا، سیکیورٹی فورسز کا علاقوں میں کلیئرنس آپریشن جاری ہے۔