اسلام آباد: وزارت خزانہ نے 1958 سے 2024 تک آئی ایم ایف سے قرض حاصل کرنے کی تفصیلات بتادیں۔

وزارت خزانہ نے سینیٹ کی قائمہ کمیٹی برائے اقتصادی امور ڈویژن میں قرض پروگرام پر بریفنگ دیتے ہوئے آئی ایم ایف سے قرض حاصل کرنے کی تفصیلات بتادیں۔

وزارت خزانہ کے مطابق پاکستان نے 1958 سے 2024 تک آئی ایم ایف سے 24 قرض پروگرام سائن کیے۔ آئی ایم ایف کے 11 قرض پروگرام سسپینڈ اور 1 پروگرام کینسل ہوا۔

وزارت خزانہ نے بتایا کہ 6 ارب 36 کروڑ ایس ڈی آر پاکستان کے ذمہ واجب الادا ہیں، ایکسٹینڈڈ فنڈ فیسیلیٹی پروگرام کے 66 کروڑ واجب الادا ہیں جب کہ آی ایف ایف پروگرام کے 2 ارب 95 کروڑ ایس ڈی آر واجب الاداہیں۔

ان کا کہنا تھا کہ ریپڈ فنانسنگ انسٹرومنٹ کے 50 کروڑ 77 لاکھ واپس کرنے ہیں، اسٹینڈ بائی ارینجمنٹ کے 2 ارب 25 کروڑ ایس ڈی آر واجب الادا ہیں۔

وزارت خزانہ نے مزید بتایا کہ پاکستان آئی ایم ایف کو 24 قرض پروگرام پر 2 ارب 44 کروڑ سود ادا کرچکا ہے جب کہ آئی ایم ایف کے 2 ارب 44 کروڑ ایس ڈی آر ساڑھے 3 ارب ڈالر تک بنتے ہیں۔