پشاور: گورنر خیبرپختونخوا فیصل کریم کنڈی کا کہنا ہے کہ فاٹا کا انضمام تو کرلیا لیکن انہیں اتنے وسائل بھی دیے جائیں۔

گورنر خیبرپختونخوا فیصل کریم کنڈی نے میڈیا سے گفتگو کرتے ہوئے کہا کہ پولیس کے جوان شہید ہورہے ہیں، ان کےپاس جدید اسلحہ نہیں جب کہ کے پی پولیس کے پاس فرانزک لیب تک موجود نہیں۔

فیصل کریم کنڈی نے کہا کہ فاٹا کا انضمام تو کرلیا، انہیں اتنے وسائل بھی دیے جائیں، اسلام آباد جائیں گے اور اپنے صوبے کا حق لیں گے۔ صوبائی بیوروکریسی کو کہنا چاہتا ہوں وقت ایک جیسا نہیں رہتا۔

گورنر خیبرپختونخوا کا کہنا تھا کہ سب پارلیمنٹرین کے ساتھ تعاون کریں گے، 10 سال کے پی میں آپ کی حکومت تھی تو خزانے کے ساتھ کیا کیا؟ ہم نے پرامن صوبہ آپ کے حوالے کیا تھا۔

انہون نے مزید کہا کہ آپ بھیک بھی مانگتےہیں، بدمعاشی بھی کرتے ہیں، ایسا نہ ہو کہیں آپ پیسوں کے لیے وزیراعلیٰ ہاؤس کو بھی بیچ دیں، سلطان راہی کے ڈائیلاگ مارکرعوامی مسائل حل نہیں ہوں گے۔