اسلام آباد: وفاقی کابینہ نے لاپتہ افراد کے خاندانوں کے لئے 50 لاکھ روپے فی کس امدادی پیکج کی منظوری دے دی۔

وفاقی وزیر قانون اعظم نذیر تارڑ کا کہنا ہے کہ لاپتہ افراد پرکمیشن گذشتہ بارہ، تیرہ سال سے کام کررہا ہے، پی ڈی ایم حکومت میں وزیراعظم شہبازشریف نے تمام جماعتوں پر مشتمل کمیٹی قائم کی۔

اعظم نذیر تارڑ نے کہا کہ نگران حکومت میں لاپتہ افراد سے متعلق کمیٹی دوبارہ تشکیل دی گئی جب کہ خفیہ اور ریاستی اداروں سے مشاورت کے بعد رپورٹ مرتب کی گئی۔

انہوں نے بتایا کہ لاپتہ افراد پر دو کمیٹیوں کی رپورٹ آج کابینہ میں پیش کی گئی، لاپتہ افراد کے بارے میں کابینہ کمیٹی کی رپورٹ کی آج کابینہ نے توثیق کردی ہے۔

وفاقی وزیر قانون کا کہنا تھا کہ کابینہ نے آج لاپتہ افراد کے خاندانوں کے لئے 50 لاکھ روپے فی کس امدادی پیکج کی منظوری دی ہے۔

اعظم نذیر تارڑ کہتے ہیں کہ ریاست ماں کی طرح ہوتی ہے، اسی سوچ کے تحت متاثرہ افراد کو ریلیف دیا جارہا ہے، لاپتہ افراد سے متعلق کابینہ کمیٹی کی سفارشات کی آج کابینہ نے منظوری دی ہے۔

ان کا مزید کہنا تھا کہ افغان جنگ کے بعد دہشت گردی نے پاکستان کو اپنی لپیٹ میں لے لیا، دہشت گردی کی وجہ سے پاکستان کو کئی طرح کے اندرونی چیلنجز کا سامنا ہے۔