آرمی چیف جنرل عاصم منیر نے نوجوانان پاکستان کی تقریب سے خطاب کرتے ہوئے کہا کہ آزاد ریاست کی اہمیت جاننی ہے تو لیبیا، کشمیر اور غزہ کی عوام سے پوچھو۔

آرمی چیف نے کہا کہ آپ کو دیکھ کر یقین ہو جاتا ہے کہ پاکستان کا مستقبل محفوظ ہاتھوں میں ہے، علم انسان کو دوسروں سے ممتاز کرتا ہے۔

جنرل عاصم منیر کا کہنا تھا کہ عوام کو سوشل میڈیا سے پیدا فتنے سے دور رکھنا ریاست کی ذمہ داری ہے، عوام، حکومت، فوج میں مضبوط رشتہ ہی ملکی تحفظ اور ترقی کا ضامن ہے۔

ان کا کہنا تھا کہ جو پاکستان کے ڈیفالٹ کا بیانیہ بنا رہے تھے وہ آج کہاں ہیں؟ بحیثیت مسلمان ہمیں ناامیدی سے منع کیا گیا ہے۔

اپنے خطاب میں آرمی چیف جنرل عاصم منیر نے قرآن کی آیت پڑھ کر سنائی، پاکستان کا سب سے بڑا اور قیمتی سرمایہ ہمارے نوجوان ہیں، ہم کسی صورت قیمتی سرمایہ نوجوانوں کو ضائع نہیں ہونے دیں گے۔

آرمی چیف نے خطاب کے اختتام میں نوجوانوں کو علامہ اقبال کا شعرسنایا،

افراد کے ہاتھوں میں ہے اقوام کی تقدیر

ہر فرد ہے ملت کے مقدر کا ستارہ

آرمی چیف نے نوجوانوں کے سوالات کے جواب میں پاک فوج کا مؤقف بھی بیان کیا، انہوں نے کہا کہ  پارا چنار فسادات پر قبائل زمینی، فروعی تنازعات ختم کرنے میں مدد دیں۔

آرمی چیف جنرل عاصم منیر نے مزید کہا کہ کے پی کی عوام 22 سال سے فوج کیساتھ دہشتگردی کیخلاف سیسہ پلائی دیوار بنی رہی، میرا یہ ایمان ہے کہ اللہ ہمیں دہشتگردی کے خلاف فتح مبین عطا کرے گا۔