کراچی: جماعت اسلامی نے کراچی میں احتجاجی دھرنے کی نئی تاریخ کا اعلان کردیا۔

جماعت اسلامی کی جانب سے کراچی میں دھرنا ہفتہ 3 اگست کو شام 5 بجے گورنر ہاؤس پر دیا جائے گا، دھرنے کا آغاز جامع مسجد خضراء سے 5 بجے ہوگا۔

گورنر ہاؤس پر دھرنا راولپنڈی دھرنے کا تسلسل اور اس سے اظہار یکجہتی کے لیے دیا جارہا ہے جب کہ گورنر ہاؤس دھرنے کی نئی تاریخ کا فیصلہ امیر جماعت اسلامی کراچی منعم ظفر خان کی زیر صدارت ذمہ داران کے اجلاس میں کیا گیا۔

اجلاس میں جمعہ کو شہر بھر کی مساجد میں اسماعیل ہنیہ شہید کی غائبانہ نماز جنازہ کے فیصلے کا بھی اعادہ کیا گیا ہے۔

خیال رہے کہ جماعت اسلامی کا مطالبہ ہے کہ بجلی بلوں میں ناجائز ٹیکسز، ظالمانہ سلیب سسٹم اور آئی پی پیز سے کیے گئے عوام دشمن معاہدے ختم کیے جائیں۔

آئی پی پیز کے بجٹ میں تنخواہ دار طبقے اور تاجروں پر لگائے گئے ظالمانہ ٹیکس واپس لیے جائیں، جاگیرداروں اور طبقہ اشرافیہ پر ٹیکس لگایا جائے۔

جماعت اسلامی کا یہ بھی مطالبہ ہے کہ کے الیکٹرک کا لائسنس منسوخ کرکے فرانزک آڈٹ کیا جائے، لوڈ شیڈنگ کا خاتمہ اور سستی بجلی فراہم کی جائے۔