بنگلہ دیش میں طلباء کی سول نافرمانی کی دو دن سے جاری تحریک میں پُرتشدد واقعات میں 21 افراد ہلاک اور 200 سے زائد زخمی ہو گئے ہیں۔

غیر ملکی خبر رساں ادارے کی خبر کے مطابق بنگلہ دیش میں طلبا کی جانب سے کوٹا سسٹم کے خلاف احتجاج اب سول نافرمانی میں تبدیل ہو چکا ہے، جس کے بعد ملک بھر میں طلبا اور سیکیورٹی اداروں کے درمیان جھڑپوں کا سلسلہ جاری ہے۔

جھڑپوں میں اب حکومتی جماعت کے کارکن مظاہرین کے خلاف سیکیورٹی فورسز کا ساتھ دے رہے ہیں، ملک کے متعدد علاقوں میں فائرنگ سے عوامی لیگ کے کارکنوں کے خلاف کریک ڈاؤن جاری ہے۔

رپورٹس کے مطابق ان جھڑپوں میں عوامی لیگ کے متعدد مقامی رہنما بھی ہلاک ہو چکے ہیں جس کی وجہ سے طلبا اور عوامی لیگ کے کارکن بپھر گئے ہیں۔

مشتعل مظاہرین نے متعدد سرکاری املاک کو نذر آتش کر دیا ہے جبکہ اطلاعات ہیں کہ حکومتی جماعت سے وابستہ دو ارکان اسمبلی کے گھر بھی جلا دیئے گئے ہیں۔