وزیر اعظم شہباز شریف سے پیپلز پارٹی کے وفد نے ملاقات کی۔

چیئرمین پیپلزپارٹی بلاول بھٹو نے وفد کی قیادت کی، پی پی پی وفد میں خورشید شاہ، نوید قمر، میئرکراچی مرتضیٰ وہاب شامل تھے۔

وزیر اعظم نے وفد سے گفتگو میں کہا کہ معاشی اشاریوں میں حالیہ بہتری خوش آئند ہے، گزشتہ ماہ افراط زر کی شرح سنگل ڈیجٹ میں آگئی ہے۔

وزیر اعظم نے وفد کو بتایا کہ اسٹیٹ بینک نے پالیسی ریٹ میں 2 فیصد کمی کی ہے، پاکستانی معیشت پر سرمایہ کاروں کے اعتماد میں اضافہ ہوا ہے، آج ہی پٹرولیم مصنوعات کی قیمتوں میں مزید کمی کی گئی، یہ حکومتی کوششوں کے حوالے سے ایک اور کاوش ہے۔

انہوں نے کہا کہ ملک وقوم کیلئے بتدریج بہتری کے آثارپیدا ہو رہے ہیں۔

ملاقات میں مجوزہ آئینی ترمیم پر تفصیلی تبادلہ خیال کیا گیا، مجوزہ آئینی ترمیم کے حوالے سے مشاورت کو وسیع کرنے پر بھی تبادلہ خیال کیا گیا۔

وزیر اعظم نے کہا کہ آئین میں ترمیم اور قانون سازی پارلیمنٹ کا اختیار ہے، پارلیمنٹ بالادست ادارہ ہے، 24 کروڑ عوام نے پارلیمنٹ کو قانون سازی کا مینڈیٹ دیا ہے۔

انہوں نے کہا کہ مجوزہ آئینی ترمیم کا مقصد عوام کو انصاف کی مؤثر فراہمی ہے، آئینی ترمیم پر تمام سیاسی جماعتوں سے مشاورت کا سلسلہ جاری رہے گا۔

ملاقات میں ملک کی مجموعی وسیاسی صورتحال پربھی بات چیت کی گئی جبکہ بلاول بھٹو اور دیگر رہنما مشاورت میں اپنا کردار ادا کریں گے۔

ملاقات اتفاق کیا گیا کہ مشاورت میں کسی نتیجے پر پہنچنے کی کوشش کی جائے گی۔