وزیراعلیٰ خیبرپختونخوا علی امین گنڈا پور نے جلسے سے خطاب کرتے ہوئے صحافیوں پر بے بنیاد الزامات عائد کر دیئے۔

علی امین گنڈا پور کی جانب سے بے بنیاد الزامات لگانے پر پی ٹی آئی بیٹ رپورٹرز ایسوسی ایشن نے سخت مذمت کی۔

پی ٹی آئی بیٹ رپورٹرز ایسوسی ایشن نے وزیر اعلیٰ خیبرپختونخوا کے خلاف اندراج مقدمے کیلئے درخواست دینے کا اعلان کیا ہے۔

بیٹ رپورٹرز کا کہنا تھا کہ وزیر اعلیٰ کی تقریر میں صحافیوں کو بکاؤ کہا گیا اور پی ٹی آئی کارکنان نے جلسہ گاہ میں موجود ڈی ایس این جیز کا گھیراؤ کیا۔

رپورٹرز کا کہنا تھا کہ وزیراعلیٰ کی تقریر کے بعد صحافیوں کی جان کو خطرہ ہے، انہوں نے مطالبہ کیا کہ علی امین گنڈا پور فی الفور معافی مانگیں۔

بیٹ رپورٹرز کا کہنا تھا کہ اگر وزیر اعلیٰ خیبر پختونخوا علی امین گنڈا پور نے معافی نہ مانگی تو ہم ان کے خلاف قانونی کارروائی کریں گے۔