ترجمان پی ڈی ایم اے کے مطابق آئندہ 24 گھنٹوں میں پنجاب کے بیشتر اضلاع میں بارشوں کا امکان ہے۔ مون سون بارشوں کا سپیل 4 ستمبر تک جاری رہنے کی پیشگوئی ہے۔

ترجمان پی ڈی ایم اے کا کہنا ہے کہ 2 سے 3 ستمبر کے دوران راولپنڈی، اٹک، چکوال، جہلم، منڈی بہاؤالدین، گجرات، گوجرانولہ، خوشاب سرگودھا، میانوالی اور چنیوٹ میں بارشیں متوقع ہیں۔ لاہور، قصور، نارووال، ساہیوال، ٹوبہ ٹیک سنگھ، فیصل آباد، جھنگ اور میانوالی میں بھی گرج چمک کے ساتھ بارشوں کا امکان ہے۔

پی ڈی ایم اے کے مطابق 3 سے 4 ستمبر تک جنوبی پنجاب کے اضلاع بہاولپور، بہاولنگر، خان پور، ڈیرہ غازی خان، ملتان، لیہ، راجن پور اور رحیم یارخان میں وقفے وقفے سے بارشیں متوقع ہیں۔ پنجاب کے تمام دریاؤں وندی نالوں میں پانی کا بہاؤ نارمل سطح پرہے۔

ڈی جی پی ڈی ایم اے کا کہنا ہے کہ دریائے سندھ چناب، راوی، جہلم اورستلج میں پانی کا بہاؤ نارمل لیول پر ہے۔ راجن پور اور ڈیرہ غازی خان ہل ٹورنٹس میں بھی نارمل صورتحال ہے۔ منگلا ڈیم میں پانی کی سطح 79 فیصد ،تربیلا ڈیم میں 100 فیصد ہے۔

ڈی جی عرفان علی کاٹھیا کے مطابق فی الوقت پنجاب کے دریاؤں میں سیلاب کا کوئی خطرہ نہیں۔ وزیر اعلیٰ پنجاب کی ہدایات کے پیش نظر پی ڈی ایم اے و متعلقہ ادارے الرٹ ہیں۔ شہریوں کے تحفظ کیلئے تمام تر وسائل بروئے کارلائے جا رہے ہیں۔

ترجمان کا کہنا ہےکہ عوام الناس سے التماس ہے کہ مون سون بارشوں کے دوران احتیاطی تدابیر اختیار کریں۔ ایمرجنسی کی صورت میں پی ڈی ایم اے کی ہیلپ لائن 1129 پر رابطہ کریں۔