سندھ ہائی کورٹ نے نادرا کو وراثتی سرٹیفکیٹ اور لیٹر آف ایڈمنسٹریشن کی فیس وصولی سے روک دیا۔

سندھ ہائی کورٹ میں نادرا کی جانب سے وراثت کے سرٹیفکیٹ کے اجرا کی فیس وصولی کے خلاف درخواست کی سماعت ہوئی، سماعت کے دوران عدالت نے کہا کہ نادرا حکام آئندہ سماعت تک صرف شناختی کارڈ، ایف آر سی اور دیگر کے اجرا کی فیس معمول کے مطابق وصول کرسکتے ہیں۔

سندھ ہائی کورٹ نے فریقین سے وراثتی سرٹیفکیٹ کی فیس کی وصولی سے متعلق معاونت طلب کرلی، عدالت نے استفسارکیا کہ کیا نادرا جائیداد کی ملکیت کے مطابق وراثتی سرٹیفکیٹ کی فیس وصول کرسکتا ہے؟ کیا ریاست وراثتی سرٹیفکیٹ کی مد میں فیس وصول کرسکتی ہے؟ وراثتی سرٹیفکیٹ جاری نا کرنے کی صورت میں نادرا فیس وصول کرسکتی ہے؟

عدالت نے فریقین سمیت ڈپٹی اٹارنی جنرل اوراسسٹنٹ ایڈووکیٹ جنرل سے 29 ستمبر تک جواب طلب کرلیا۔

درخواست گزار نے مؤقف اپنایا کہ نادرا حکام وراثتی سرٹیفکیٹ کی درخواست مسترد کرنے کے باوجود فیس وصول کررہے ہیں، نادرا قوانین کے مطابق نادرا صرف سروسز کی فراہمی کی صورت میں فیس وصول کرسکتا ہے۔

وکیل درخواست گزارنے کہا کہ سرٹیفکیٹ کی درخواست مسترد کرنا سروسز کے زمرے میں نہیں آتا، کسی بھی فرد کی جائیداد شریعت کے مطابق قانونی ورثا میں تقسیم ہوتی ہے، وراثتی سرٹیفکیٹ کی مد میں 22 ہزار روپے فیس کا کوئی جوازنہیں ہے۔