مسلم لیگ ق کے سربراہ چوہدری شجاعت حسین سیاسی درجہ حرارت کم کرنے کے لیے متحرک ہوگئے۔

چوہدری شجاعت حسین نے اسلام آباد میں سیاسی جماعتوں کے سربراہوں، اراکین پارلیمنٹ، سنئیر صحافیوں اور حکومتی شخصیات سے اہم ملاقاتیں کیں۔

سربراہ مسلم لیگ ق سے سابق صدر وسیم سجاد، مشاہد حسین سید، محمد علی درانی سمیت اراکین پارلیمنٹ نےملاقاتیں کیں۔ سابق وفاقی وزیر چوہدری وجاہت حسین، وفاقی وزیر چوہدری سالک حسین، پارٹی ترجمان مصطفی ملک بھی ملاقاتوں میں موجود تھے۔

ملاقاتوں میں ملکی سیاسی صورت حال پر تفصیلی تبادلہ خیال کیا گیا۔ چوہدری شجاعت نے کہا کہ سیاستدان ذاتی مفادات اور تعصبات کو ترک کر کے قومی مفادات کو ترجیح دیں۔

چوہدری شجاعت حسین نے کہا کہ قومی رہنماؤں کو سیاسی اور معاشی استحکام کے لیے آگے آنا چاہیے، اراکین پارلیمنٹ پربھی ذمہ داری عائد ہوتی ہے کہ وہ مسائل سے نکلنے کے لیے قومی ایجنڈا ترتیب دیں۔