وفاقی وزیر اطلاعات عطا تارڑ کا نیول ہیڈ کوارٹرز میں یادگار شہدا کا دورہ کیا، انہوں نے یادگار شہدا پر پھول رکھے اور فاتحہ خوانی کی۔

اس موقع پر انہوں نے کہا کہ آج نیوی کے شہدا کو خراج عقیدت پیش کرنے کا دن ہے، پاک بحریہ کا ملکی دفاع میں اہم کردار ہے۔

وفاقی وزیر اطلاعات کا کہنا تھا کہ یادگار شہدا پر حاضری دینا میرے لیے باعث اعزاز ہے، پاک بحریہ نے ہمیشہ دشمن کے ناپاک عزائم کو ناکام بنایا، دہشت گردی کے خلاف جنگ میں پاک بحریہ کی قربانیاں لازوال ہیں۔

ان کا کہنا تھا کہ شہدا کی قربانیاں رائیگاں نہیں جائیں گی، دہشت گردی کے خاتمے تک چین سے نہیں بیٹھیں گے، ملک میں امن کا قیام ہر صورت یقینی بنایا جائے گا۔

عطا تارڑ نے کہا کہ ملکی معیشت کے استحکام کے لیے خصوصی اقدامات کیے جا رہے ہیں، سی پیک ملکی معیشت کے لیے انتہائی اہم ہے، پاک بحریہ سمندری حدود کی حفاظت کیلئے پُرعزم ہے۔

وفاقی وزیر اطلاعات عطا تارڑ کا مزید کہنا تھا کہ تمام ممالک کے ساتھ اچھے تعلقات چاہتے ہیں، قوم جنگ ستمبر کے شہدا کو سلام پیش کرتی ہے۔