لاہور ہائیکورٹ نے عدالتی حکم کے باجود شہری کی 650 کینال ملکیتی اراضی کا قبضہ نہ دینے کے معاملے میں وفاقی سیکریٹری دفاع کےخلاف دائر توہین عدالت کیس کی سماعت ملتوی کردی۔

عدالتی حکم پر ڈپٹی اٹارنی جنرل نےوفاقی وزارت دفاع کا تحریری جواب عدالت میں جمع کرادیا جس کے بعد عدالت نے آئندہ سماعت پر فریقین کے وکلاء کو حتمی بحث کےلئے طلب کرلیا۔

کیس کی سماعت جسٹس عابد عزیزشیخ نے کی جبکہ درخواست گزارجہانگیر صدیق کے وکیل بیرسٹرزین نے دلائل دیے۔

وکیل نے مؤقف اپنایا کہ درخواست گزارکی 630 کینال زرعی اراضی پسرور کےموضع لالے والی میں موجود ہے۔ وفاقی وزارت دفاع نے دفاعی نکتہ نظر سے درخواست گزار کی اراضی لینے کےلئے خط لکھا۔

وکیل درخواست گزارنے موقف اختیار کیا کہ چالیس سال قبل لکھے گئے خط کے مطابق نہ تو اراضی حاصل کی گئی نہ ہی قبضہ دیا جارہا ہے۔ اعلی عدلیہ نے درخواست گزار کے حق میں فیصلے دے رکھے ہیں۔

وکیل نے استدعا کی کہ سیکرٹری دفاع کی جانب سے عدالتی فیصلے پرعمل نہ کرناتوہین عدالت ہے۔ عدالت وفاقی سیکرٹری دفاع کےخلاف توہین عدالت کی کاروائی کرے۔