وزیراعلیٰ سندھ سید مراد علی شاہ کی زیرصدارت شہرکراچی کے ترقیاتی کاموں اوردیگر مسائل جن میں تجاوزات کا خاتمہ، غیرقانونی پارکنگ اور سڑکوں کی مرمت سے متعلق اہم اجلاس منعقد ہوا۔ 

اجلاس کے دوران وزیراعلٰی سندھ نے کہا کہ تجاوزات کے خاتمے کیلئے میں نے 12 جولائی کو ہدایات دی تھیں، کچھ تجاوزات ہٹائے پھردوبارہ قائم کیے گئے ہیں، شہر کے تمام ادارے بشمول پولیس اپنا نگرانی کا نظام بہتر کرے۔

سید مراد علی شاہ نے ہدایت دیتے ہوئے کہا کہ عوامی مقامات، گرین بیلٹس، سڑکوں، گلیوں اور فٹ پاتھ پر تجاوزات ناقابل برداشت ہیں، شہر سے تجاوزات کا خاتمہ کرکے عوامی مقامات کو اصل شکل میں لایا جائے۔

وزیراعلٰی سندھ نے  ضلع انتظامیہ، ٹاؤنز اور پولیس مل کر تجاوزات کا خاتمہ کر کے شہر صاف ستھرا رکھیں۔ تجاوزات ہٹانے کے ساتھ فٹ پاتھ کی مرمت فوری شروع کی جائے۔

اجلاس میں طارق روڈ، لیاقت آباد، ایم اے جناح روڈ اور دیگر اہم سڑکوں سے تجاوزات کا خاتمہ کرنے کا فیصلہ کیا گیا اورصوبائی وزیرسعید غنی کی سربراہی میں کمیٹی قائم کی گئی۔ کمیٹی آج ہی 10 تا 15 سڑکوں کی شناخت کر کے وہاں سے تجاوزات ہٹانے کا کام شروع کروائے گی۔

اجلاس میں وزیراعلٰی  سندھ نے ہدایت کی کہ شہر میں غیرقانونی پارکنگ اور ٹریفک کے مسائل مجھے حل کرکے دیں، شہر میں قائم پارکنگ کی جگہ کو ہی صرف پارکنگ کیلئے استعمال کیا جائے، میں کسی صورت غیرقانونی پارکنگ برداشت نہیں کرونگا۔ ایڈیشنل آئی جی کراچی، ڈی آئی جی ٹریفک، ڈپٹی کمشنرز اور ایس ایس پیز غیرقانونی پارکنگ کو ختم کروائیں۔

وزیراعلیٰ سندھ نے میئراورکمشنرکراچی کو ہدایت جاری کیں کہ شہری مسائل پر ہفتہ وار اجلاس کریں، اسٹریٹ لائیٹس چوری یا خراب ہوچکی ہیں اس کا فوری سدباب کیا جائے، نگرانی کا نظام مؤثرکریں تاکہ تمام مسائل بروقت حل ہوسکیں، شہرمیں نکاسی آب اور بارش سے متاثرہ سڑکوں کی مرمت کا کام جلد کیا جائے۔

وزیراعلیٰ سندھ کی زیرصدارت اہم اجلاس میں انھوں نے ہدایت جاری کیں کہ فٹ پاتھ، اسٹریٹ لائٹس یا گرین بیلٹس خراب ہوگئے ہیں ان کی مرمت کریں، نگرانی کے نظام کے ذریعہ تمام بہتے ہوئے گٹر یا بند نکاسی آب کو ٹھیک کرتے رہیں۔

اجلاس میں سڑکوں کی کھدائی کرنے کے نظام کو بہترکرنے کا فیصلہ کرتے ہوئے مرادعلی شاہ نے کہا کہ ایک ادارہ سڑکیں بناتا ہے اوردوسرہ ادارہ کھدائی کرکے اپنا کام شروع کردیتا ہے، سڑکوں کی کھدائی کا نظام بہترکرکے سوائے بہت ضروری کام کے اجازت نہ دی جائے۔

اجلاس میں صوبائی وزراء، شرجیل میمن، سعید غنی، میئر کراچی مرتضیٰ وہاب، چیف سیکریٹری آصف حیدر شاہ، کمشنر کراچی حسن نقوی، سیکریٹری توانائی مصدق خان، سیکریٹری بلدیات خالد حیدر شاہ، سیکریٹری خزانہ فیاض جتوئی، سیکریٹری ٹو سی ایم رحیم شیخ، ایڈیشنل آئی جی کراچی جاوید عالم اوڈھو، ایم ڈی سولڈ ویسٹ مینجمنٹ امتیاز شیخ، ڈی جی سندھ بلڈنگ کنٹرول اتھارٹی رشید سولنگی، ڈی جی کراچی ڈولپمنٹ اتھارٹی شجاع، ایس ای او واٹر بورڈ صلاح الدین اور دیگر شریک تھے۔