امیر جماعت اسلامی حافظ نعیم الرحمان کا کہنا ہے کہ پاکستان سے کوئی اچھے اشارے نہیں مل رہے ہیں۔

سرگودھا میں جماعت اسلامی کے کمپنی باغ میں جلسہ عام سے خطاب کرتے ہوئے حافظ نعیم الرحمن نے کہا کہ کشمیریوں پر ظلم ختم کروانا ہے مگر پاکستان سے اچھے اشارے نہیں مل رہے ہیں۔

انہوں نے کہا کہ یہ پاکستان کسی سیاستدان، جرنیل کا نہیں، یہ قائد اعظم کا پاکستان ہے، کشمیری پاکستان کی عوام سے توقع رکھتے ہیں، آپ اپنے بچوں کو کشمیر کے بارے بتائیں۔

امیر جماعت اسلامی نے کہا کہ سید علی گیلانی کے بارے میں بچوں کو بتائیں جس نے آدھی عمر جیل می گزاری لیکن مرنے تک پاکستان کے نعرے لگاتے رہے

حافظ نعیم الرحمن نے کہا کہ کشمیریوں کے حق خودارادیت کے لیے ہم انکی مدد کریں گے لیکن ہمارے حکمرانوں کو مودی بہت عزیز ہے، نواز شریف صاحب کو مودی سے ملنے لندن جانے کی کیا ضرورت تھی۔

ان کا کہنا ہے کہ آج سازشیں کر کے آپکی پارٹی اور پیپلز پارٹی، پی ڈی ایم میں کیا مولانا اور کیا کوئی اور سب کو عوام نے مسترد کیا ہے۔

امیر جماعت اسلامی نے کہا کہ آپ ہمیشہ اسٹیبلشمنٹ کی مدد سے حکومت میں آتے ہیں، آپ کو پنجاب نے، آپکو پاکستان نے مسترد کیا ہے، 70 ہزار جعلی ووٹ فارم 47 پر لکھ کر نواز شریف کو جتوایا گیا۔

ان کا کہنا تھا کہ کسانوں سے 3900 میں گندم خریدنے کا وعدہ کیا لیکن وہ گدم رُلتی رہی اور کوئی 2200 میں بھی خریدنے کو تیار نہ تھا، اسکا اثر یہ ہوا کہ کپاس اور دیگر فصلیں بھی کاشت نہ ہو سکیں۔

امیر جماعت اسلامی حافظ نعیم الرحمن نے کہا کہ اگر کسی ایک شعبہ میں ترقی ہو سکتی تھی تو وہ زراعت تھی لیکن آپ نے اس شعبہ کو تباہ کر دیا، چاول کی پیداروا 30 فیصد کم ہوئی ہے، کھاد مل ہی نہیں رہا اور مل رہا تو بہت مہنگی مل رہی ہے۔