زمبابوے نے ٹی 20 کرکٹ کی تاریخ میں سب سے بڑا اسکور کر کے دنیائے کرکٹ کو حیران کر دیا ہے۔

آئی سی سی ٹی 20 ورلڈ کپ کے سب ریجنل کوالیفائر میچ میں زمبابوے نے گیمبیا کے خلاف مقررہ 20 اوورز میں ریکارڈ 344 رنز بنا لیے۔

اس سے قبل مختصر فارمیٹ کی کرکٹ میں بڑے اسکور کا ریکارڈ نیپال کے پاس تھا، نیپال نے ایشین گیمز میں منگولیا کی ٹیم کے خلاف مقررہ 20 اوورز میں 314 رنز بنائے تھے۔

نیروبی میں ہونے والے آئی سی سی ٹی 20 ورلڈ کپ کے سب ریجنل کوالیفائر میچ میں زمبابوے نے پہلے کھیلتے ہوئے مقررہ 20 اوورز میں 4 وکٹوں کے نقصان پر 344 رنز بنائے۔

ریکارڈ اسکور میں زمبابوے کرکٹ ٹیم کے کپتان سکندر رضا کا اہم کردار تھا جنہوں نے زمبابوے کی جانب سے پہلی ٹی 20 سنچری اسکور کی۔

سکندر رضا نے 33 گیندوں پر سنچری مکمل کی اور 43 گیندوں پر 133 رنز بنا کر ناقابل شکست رہے، ان کی اننگز میں 15 چھکے اور 7 چوکے شامل تھے۔