مائیکروسافٹ کے بانی بل گیٹس نے امریکی انتخابات میں نائب صدر کملا ہیرس کی انتخابی مہم کے لیے 50 ملین ڈالر عطیہ بھی دے دیا۔

بل گیٹس نے 5 نومبر کو ہونے والے امریکی صدارتی انتخابات میں ڈونلڈ ٹرمپ کے خلاف مقابلہ کرنے والی کملا ہیرس کی عوامی طور پر حمایت نہیں کی ہے۔

امریکی اخبار کی رپورٹ کے مطابق ارب پتی اور مائیکروسافٹ کے شریک بانی بل گیٹس نے حال ہی میں کملا ہیرس کی امریکی صدارتی دوڑ میں مدد کرنے والی ایک غیر منافع بخش تنظیم کو تقریبا 50 ملین ڈالر کا عطیہ دیا ہے۔

ہیرس کی حمایت کرنے والے بیرونی فنڈ ریزنگ گروپ فیوچر فارورڈ کو دیے گئے عطیات کا مقصد خفیہ رکھنا تھا کیونکہ گیٹس نے عوامی طور پر ڈیموکریٹ امیدوار کی حمایت نہیں کی ہے، جو 5 نومبر کو ہونے والے امریکی صدارتی انتخابات میں ریپبلکن ڈونلڈ ٹرمپ کے خلاف ہیں۔

امریکی اخبار کی ایک رپورٹ کے مطابق بل گیٹس نے رواں سال دوستوں اور دیگر افراد کو نجی فون کالز میں اس بارے میں ‘تشویش’ کا اظہار بھی کیا تھا کہ ڈونلڈ ٹرمپ کی دوسری صدارت کیسی ہوگی۔

رپورٹ میں کہا گیا ہے کہ ان کی فلاحی تنظیم بل اینڈ میلنڈا گیٹس فاؤنڈیشن کو ٹرمپ کے دوبارہ منتخب ہونے کی صورت میں خاندانی منصوبہ بندی اور عالمی صحت کے پروگراموں میں ممکنہ کٹوتیوں پر تشویش ہے۔

تاہم بل گیٹس نے اس بات پر زور دیا ہے کہ وہ کسی بھی امیدوار کے ساتھ کام کر سکتے ہیں۔

امریکی اخبار کی رپورٹ کے جواب میں ایک بیان میں بل گیٹس نے اپنی دو طرفہ حمایت پر زور دیا لیکن یہ بھی کہا کہ یہ انتخابات مختلف ہیں۔

انہوں نے امریکی اخبار کو بتایا کہ میں ان امیدواروں کی حمایت کرتا ہوں جو امریکہ اور دنیا بھر میں صحت کی دیکھ بھال کو بہتر بنانے، غربت میں کمی اور آب و ہوا کی تبدیلی سے لڑنے کے لئے واضح عزم کا مظاہرہ کرتے ہیں۔

ان کا کہنا تھا کہ ‘میری تمام سیاسی جماعتوں کے رہنماؤں کے ساتھ کام کرنے کی ایک طویل تاریخ ہے لیکن یہ انتخابات مختلف ہیں اور امریکیوں اور دنیا بھر کے کمزور ترین افراد کے لیے بے مثال اہمیت کے حامل ہیں۔’