وزیر داخلہ محسن نقوی اور آئی جی اسلام آباد نے مشترکہ نیوز کانفرنس میں واضح کیا ہے کہ ملک بھر میں حالیہ احتجاج اور تشدد کی کارروائیوں کے ذمہ دار عناصر کو ہر صورت قانون کے کٹہرے میں لایا جائے گا۔

وزیر داخلہ کا کہنا تھا کہ کسی کے ساتھ کوئی مذاکرات نہیں ہو رہے ہیں، شہداء کا خون رائیگاں نہیں جائے گا اور سب پر ایف آئی آر درج ہوں گی۔

وزیر داخلہ نے مزید کہا کہ احتجاج کے دوران شہید ہونے والے پولیس اہلکار اور زخمیوں کے ذمہ دار وہ افراد ہیں جنہوں نے احتجاج کی کال دی تھی۔

 انہوں نے کہا کہ کچھ دیر پہلے شہید کانسٹیبل مبشر کے نماز جنازہ میں شریک ہوئے، ان کی قربانی بے جا نہیں جائے گی۔

وزیر داخلہ نے بیلاروس کے صدر کے دورے کا ذکر کرتے ہوئے کہا کہ ان کی پوری کوشش تھی کہ بیلاروس کے صدر کا دورہ منسوخ ہو جائے، لیکن صدر بیلاروس پہنچ چکے ہیں اور وہ خیریت سے اسلام آباد میں موجود ہیں۔

کل بھی عالمی سطح پر پاکستان کے لیے شرمندگی کا باعث بننے کی کوشش کی گئی، مذاکرات پر چند گھنٹے رک جائیں کل صبح تک سب کچھ پتہ چل جائے گا۔

انہوں نے مزید کہا کہ جو بھی احتجاج کی غرض سے اسلام آباد آئے گا، اس کے ساتھ سختی سے نمٹا جائے گا اور قانون کے مطابق کارروائی کی جائے گی۔

وزیر داخلہ نے واضح کیا کہ ہمارے پاس گولیاں چلانے کا اختیار ہے، مگر وہ لوگ لاشیں چاہتے ہیں، وہ آئیں اور ہم انہیں جانے دیں ایسا ہو نہیں سکتا۔

رینجرز کی موجودگی کی یقین دہانی کراتے ہوئے وزیر داخلہ نے کہا کہ اگر رینجرز جوابی فائرنگ کرتی تو پتھر گڑھ سے آگے نہیں نکل پاتے۔

تاہم، انہوں نے یہ بھی کہا کہ حکومت کی کوشش ہے کہ کسی کی جان کا نقصان نہ ہو، اور وہ اس بات کو یقینی بنانے کے لیے ہر ممکن اقدام کریں گے۔

وزیر داخلہ نے کہا کہ پی ٹی آئی والوں سے منسٹر انکلیو میں میری کوئی ملاقات نہیں ہوئی اور احتجاج کی کال کو دو دن ہو چکے ہیں، وہ ابھی بھی راستے میں ہیں، کس طرح پلان کیا گیا ہم اس کی تحقیقات میں تمام ثبوت سامنے لائیں گے۔

آخر میں وزیر داخلہ نے کہا کہ میں نے کبھی نہیں کہا تھا کہ یہ لوگ اٹک سے آگے نہیں آ سکیں گے، بس تھوڑا وقت انتظار کریں، پھر میں کھل کر بات کروں گا۔