ہائیکورٹ نے لاپتہ افراد کی بازیابی کے کیس میں تفتیشی افسرکومجسٹریٹ کے پاس رپورٹ پیش کرنے کا حکم دے دیا۔

سندھ ہائی کورٹ میں لاپتہ افراد کی بازیابی سے متعلق درخواستوں کی سماعت ہوئی۔ سماعت کے دوران عدالت نے پوچھا کہ لاپتہ شہری کون ہے اورکہاں سے لاپتہ ہوا ہے؟

درخواست گزارنے جواب دیا کہ 70 سالہ احمد جان ڈیفنس کےعلاقے سے لاپتہ ہے، شہری کو نامعلوم افراد نے اغوا کیا ہے۔

تفتیشی افسرنے جواب دیا کہ شہری کی مسنگ پرسنزکی ایف آئی آر درج کرلی گئی ہے، تفتیش کا آغازبھی کردیا گیا ہے۔

عدالت نے کہا کہ ایک لاکھ 40 ہزارسے زائد لاپتہ کے کیسزدرج ہیں، ہرکیس کو مسنگ پرسنزکی کیٹیگری میں تو نہیں ڈال سکتے۔  اس کے ساتھ ہی عدالت نے تفتیشی افسرکوشہری کی بازیابی سے متعلق رپورٹ ماتحت عدالت میں پیش کرنے کا حکم دے دیا۔

4 سالہ بچے کی گمشدگی کے کیس میں بچے کا والد عدالت میں پیش ہوا اورمؤقف اپنایا کہ سی سی ٹی وی فوٹیج میں ملزم کا چہرہ نظرآرہا ہے، اس کے باوجود بھی بچے کو بازیاب نہیں کرایا گیا۔

سندھ ہائی کورٹ نے بچے کی گمشدگی سے متعلق کیس کو ماتحت عدالت بھیجتے ہوئے تفتیشی افسرکو مجسٹریٹ کے پاس رپورٹ پیش کرنے کا حکم دے دیا اورلاپتہ افراد کی بازیابی سے متعلق درخواستیں نمٹا دیں۔