ترجمان پی آئی اے نے سوسائیٹی آف ائیر کرافٹ انجنئیرز (سیپ) کی جانب سے ہونے والی پریس کانفرنس پر لگائے گئے الزامات کی تردید کی ہے۔

ترجمان پی آئی اے کے مطابق سوسائٹی آف ائیر کرافٹ انجینئرز کی نئی منتخب باڈی کی جانب سے قومی ائر لائین کے خلاف ہرزہ سرائی افسوسناک ہے۔

سوسائٹی کے نو منتخب صدر کی جانب سے پی آئی اے فضائی بیڑے میں شامل طیاروں کے دس انجنوں کو کوڑیوں کے مول فروخت کرنے کی بات میں کوئی حقیقت نہیں ہے۔

پی آئی اے انتظامیہ شفافیت پر یقین رکھتی ہے اور جن طیاروں کے انجن فروخت کرنے کی بات کی جارہی ہے یہ انجن مکمل طور پر ناکارہ ہیں اور تمام قواعد و ضوابط کے تحت ان ناکارہ انجنوں کی فروخت کے لئے ٹینڈرجاری کیا گیا ہے جو کہ ایوی ایشن انڈسٹری میں ایک معمول کی کاروائی ہے۔

اس ضمن تمام مروجہ پبلک پروکیورمنٹ قوانین کی مکمل پیروی کی گئی ہے اور ابھی یہ کام جاری ہے۔

ترجمان نے کہا کہ ان ناکارہ انجنوں کی فروخت سے حاصل ہونے والی آمدن کو طیاروں کو آپریشنل رکھنے کے لئے پرزہ جات کی خریداری پر خرچ کیا جائے گا۔

ترجمان نے بتایا کہ پی آئی اے ملازمین کا پنشن فنڈ اور پرویڈینٹ فنڈ پہلے ہی پی ائی اے ہولڈنگ کمپنی میں منتقل کردیا گیا یے اور تمام ملازمین کے واجبات بروقت ادا کئے جارہےبیں،  اور تمام ریٹائرڈ ملازمین کو پنشن کی ادائیگی باقاعدگی سے کی جارہی ہے۔

ترجمان نے مزید بتایا کہ سپریم کورٹ آف پاکستان کے احکامات کے تحت 2017 سے پی آئی اے میں بھرتیوں پر پابندی عائد کی گئی ہے۔

تا ہم چند ایسے عہدوں پر جو کہ سیکورٹی ایکسچینج کمیشن آف پاکستان کی ضروریات کے تحت ضروری ہوتی ہیں، کو کنٹریٹ پر بھرتی کیا جاتا یے جس کیلئے تمام ضوابط پورے کئے جاتے ہیں۔