جنوبی وزیرستان میں سیکیورٹی فورسز اور دہشت گردوں کے درمیان فائرنگ کے تبادلے میں 5 خارجہ دہشت گرد جہنم واصل جبکہ 4 جوان شہید ہو گئے۔

پاک فوج کے شعبہ تعلقات عامہ (آئی ایس پی آر) کے مطابق دہشت گردوں کے ساتھ جھڑپ جنوبی وزیرستان کے علاقے کرامہ میں ہوئی، اور شدید فائرنگ کے تبادلے میں دھرتی کے 4 بہادر سپوتوں نے جام شہادت نوش کیا۔

دہشت گردوں کے ساتھ جھڑپ میں شہید ہونے والے نائب صوبیدار طیب شاہ کی عمر 38 برس تھی ان کا تعلق ٹانک سے تھا، شہید نے زندگی کے 20 سال تک دفاع وطن کا مقدس فریضہ سرانجام دیا۔ شہید کے سوگواران میں والدین اور اہلیہ شامل ہیں۔

 شہید لانس نائیک گلاب زمان کی عمر 30 سال جبکہ تعلق ضلع کرک سے تھا۔

 لانس نائک شہید مزمل محمود کی عمر 30 برس تھی اور تعلق ضلع کرک سے تھا، شہید نے7 سال تک دفاع وطن کا مقدس فریضہ سرانجام دیا

 لانس نائک حبیب اللہ کی عمر 28 برس تھی جبکہ ان کا تعلق اورکزئی سے تھا، شہید نے 7 سال تک  پاکستان کے دفاع کی جنگ لڑی۔

آئی ایس پی آر کا کہنا تھا کہ چاروں شہدا نے دہشت گردوں کے خلاف بے جگری سے لڑتے ہوئے وطن پر اپنی جان نچھاور کی۔

علاقے کو دہشت گردوں سے مکمل طور پر پاک کرنے کے لیے سینیٹائزیشن آپریشن جاری ہے۔

آئی ایس پی آر کے مطابق پاکستان کی سیکیورٹی فورسز وطن عزیز سے دہشت گردی کی لعنت کے خاتمے کے لیے پرعزم ہیں۔

آئی ایس پی آر کا مزید کہنا تھا کہ بہادر سپاہیوں کی عظیم قربانیاں دہشت گردی کے خلاف جنگ میں ہمارے عزم کو تقویت بخشتی ہیں۔