لاہور ہائیکورٹ کے جسٹس شاہد کریم نے پنجاب حکومت کی جانب سے اسموگ کے خاتمے کے پلان کی تعریف کی۔

جسٹس شاہد کریم کا کہنا تھا کہ یہ تمام اقدامات قابل تعریف اورقابل تحسین ہیں، کام جاری رہا تومثبت نتائج برآمد ہوں گے۔

ایڈوکیٹ جنرل نے کہا کہ لاہور اور گردونواح سے صنعتوں اور کارخانوں کو ہٹانا ہوگا، صنعتوں کو دوسری جگہ منتقل کرنے پرغور شروع کر دیا ہے، جی ٹی روڈ، ملتان روڈ سے صنعتوں کو منتقل کرنے کا پلان ہے۔

لاہور ہائیکورٹ کا کہنا تھا کہ صنعتوں کی منتقلی کاعمل بھی پہلے ہی شروع ہوچکا ہے۔

ایڈووکیٹ جنرل پنجاب نے ماحولیاتی بہتری کیلئے پالیسی ریکارڈ پیش کر دیا۔

جسٹس شاہد کریم نے کہا کہ ایسےاقدامات شامل ہیں جو اس سے پہلے کبھی نہیں ہوئے، سیلاب سے بچاؤ کیلئے ترقیاتی اسکیموں کی تفصیلات پیش کی گئیں، کاشت کاری کیلئے آبی فراہمی پر توجہ دی گئی۔

لاہور ہائیکورٹ نے کہا کہ اسموگ کے خاتمے کیلئے وافر بجٹ مختص کرنا قابل تعریف ہے، مارچ 2025 سے الیکٹرک بسیں لاہور میں چلا دی جائیں گی۔

شجرکاری کیلئے نئی جگہوں کی نشاندہی کا عمل جاری ہے، دستیاب جگہوں پر شجرکاری کی جائےگی، درختوں کی تعداد میں اضافے سے ماحولیاتی بہتری میں مدد ملے گی، دریائے راوی کے ساتھ شاہدرہ تک شجرکاری کی جائے گی۔