چیف جسٹس یحییٰ آفریدی نے خیبرپختونخوا کے جیلوں میں اصلاحات کے سلسلے میں پشاور کا دورہ کیا اور جیل اصلاحات کے حوالے سے اہم فیصلے کیے۔

چیف جسٹس کی زیرصدارت جیل ریفارمز اجلاس منعقد ہوا، جس میں جیلوں کی حالت زار اور قیدیوں کی فلاح و بہبود کے لیے لائحہ عمل تیار کرنے پر گفتگو کی گئی۔

اجلاس میں ایک ذیلی کمیٹی تشکیل دی گئی جس میں عائشہ بانو، فضل شکور، احمد کریم کنڈی اور امجد علی شامل ہیں۔ یہ کمیٹی جیلوں میں موجود مختلف اقسام کے قیدیوں کے حالات پر رپورٹ تیار کرے گی۔ کمیٹی کا مقصد جیلوں میں اصلاحات کی تجاویز تیار کرنا اور قیدیوں کی فلاح و بہبود کے لئے مؤثر اقدامات کرنا ہے۔

چیف جسٹس یحییٰ آفریدی نے اجلاس میں کہا کہ مؤثر اور منصفانہ نظام انصاف کی ضرورت ہے اور اس بات پر زور دیا کہ جیلوں میں قیدیوں کے حالات کو بہتر بنانے کے لیے فوری اقدامات کیے جائیں۔ انہوں نے کیمپ کورٹ کے ذریعے 1289 معمولی جرائم کے قیدیوں کی رہائی کو سراہا۔

اس موقع پر پشاور ہائیکورٹ کے چیف جسٹس اشتیاق ابراہیم، آئی جی خیبرپختونخوا، آئی جی جیل خانہ جات اور سپریم کورٹ کے رجسٹرار سمیت دیگر اہم شخصیات نے شرکت کی۔ اجلاس میں قومی جیل اصلاحاتی پالیسی پر تبادلہ خیال کیا گیا اور قیدیوں کے لیے تعلیمی و نفسیاتی امداد کے پروگرامز متعارف کرانے کی تجویز بھی دی گئی۔

چیف جسٹس آفریدی نے اس بات کا بھی عندیہ دیا کہ فارنزک سائنس کی سہولتوں کو اپ گریڈ کرنے پر زور دیا جائے گا تاکہ جیلوں میں مزید موثر اصلاحات لائی جا سکیں۔

یہ اقدامات خیبرپختونخوا کے جیلوں میں قیدیوں کی حالت بہتر بنانے اور ان کے حقوق کے تحفظ کے لئے اہم قدم ثابت ہوں گے۔