امریکا نے عالمی عدالت کی جانب سے اسرائیلی وزیراعظم بینجمن نیتن یاہو اور سابق وزیردفاع یوو گیلنٹ کے وارنٹ گرفتاری جاری کرنے کے فیصلے کو مسترد کر دیا ہے۔

وائٹ ہاؤس کے قومی سلامتی کے ترجمان نے کہا کہ امریکا اس فیصلے کو بنیادی طور پر مسترد کرتا ہے۔ ان کا کہنا تھا کہ عالمی عدالت کا فیصلہ اس بات کی غمازی کرتا ہے کہ اس میں عمل کی غلطیاں ہوئیں اور پروسیکیوٹر اس معاملے کو مزید پیچیدہ بنا رہے ہیں۔

یاد رہے کہ عالمی عدالت نے غزہ میں 2023 سے 2024 کے دوران ہونے والے جنگی جرائم کے الزام میں اسرائیل کے وزیراعظم نیتن یاہو اور سابق وزیردفاع یوو گیلنٹ کے وارنٹ گرفتاری جاری کیے تھے۔

عالمی عدالت کا کہنا ہے کہ دونوں افراد نے جان بوجھ کر غزہ میں شہری آبادی کو بنیادی ضروریات سے محروم کیا، جیسے خوراک، پانی، ادویات اور ایندھن۔

دوسری جانب نیدرلینڈز کے وزیرخارجہ کیسپر ویلڈ کیمپ نے عالمی عدالت کے فیصلے کا احترام کرنے کا اعلان کرتے ہوئے کہا کہ اگر اسرائیلی وزیراعظم نیتن یاہو نیدرلینڈز کی سرزمین پر قدم رکھتے ہیں تو انہیں گرفتار کر لیا جائے گا۔

غزہ پر اسرائیلی حملوں کے نتیجے میں اب تک 44 ہزار سے زائد فلسطینی شہید اور ایک لاکھ سے زائد زخمی ہو چکے ہیں، جن میں اکثریت خواتین اور بچوں کی ہے۔