ایک سینئر امریکی خصوصی ایلچی نے دعویٰ کیا ہے کہ اسرائیل اور حزب اللہ کے درمیان تنازع کو ختم کرنے کا ایک حقیقی موقع ہمارے پاس موجود ہے۔

امریکی خصوصی ایلچی آموس ہوچسٹائن نے بیروت میں لبنانی پارلیمنٹ کے اسپیکر نبیہ بیری کے ساتھ ملاقات میں کہا کہ خلا کم ہو رہا ہے جو جنگ بندی کے معاہدے تک پہنچنے کے لیے واشنگٹن کی کوششوں میں پیش رفت کا اشارہ ہے۔

ملاقات کے بعد ایک پریس کانفرنس سے خطاب کرتے ہوئے ہوچسٹائن کا کہنا تھا کہ ‘میں واپس آیا ہوں کیونکہ ہمارے پاس اس تنازعے کو ختم کرنے کا حقیقی موقع ہے۔’

انہوں نے کہا کہ یہ فیصلہ سازی کا لمحہ ہے، میں یہاں بیروت میں اس فیصلے کی سہولت فراہم کرنے کے لیے موجود ہوں لیکن آخر کار یہ فریقین کا فیصلہ ہے کہ وہ اس تنازعے کے کسی نتیجے پر پہنچیں۔

آموس ہوچسٹائن کا مزید کہنا تھا کہ جنگ بندی اب ہماری گرفت میں ہے، مجھے امید ہے کہ آنے والے دنوں میں ایک پختہ فیصلہ سامنے آئے گا۔