ترجمان سندھ حکومت سعدیہ جاوید نے سانحہ کرم پر غم و غصے کا اظہار کرتے ہوئے کہا کہ ہم سب اس سانحے پر غم زدہ ہیں اور متاثرین کے ساتھ دکھ اور افسوس کا اظہار کرتے ہیں۔

انہوں نے کہا کہ کرم واقعے پر جرگے نے فیصلہ کر لیا ہے، اس لیے اب کراچی میں احتجاج کو ختم کرنا چاہیے تاکہ شہر کے حالات معمول پر واپس آ سکیں۔

سعدیہ جاوید نے مذہبی جماعت سے درخواست کی کہ وہ کراچی کے شہریوں کی تکالیف کو سمجھیں، کیونکہ شہر میں سڑکوں اور راستوں کے بند ہونے کی وجہ سے شہری شدید پریشانی کا سامنا کر رہے ہیں۔

انہوں نے مزید کہا کہ شہر میں احتجاج کی وجہ سے نظام زندگی درہم برہم ہو چکا ہے اور مختلف علاقوں میں ایمبولینس سمیت دیگر ضروری سامان کی ترسیل میں مشکلات پیش آ رہی ہیں۔

انہوں نے مذہبی جماعت کے علمائے کرام سے بھی اپیل کی کہ وہ کراچی میں احتجاج کے خاتمے کے لیے اپنا کردار ادا کریں تاکہ شہریوں کو مزید مشکلات کا سامنا نہ ہو۔

سعدیہ جاوید نے کہا کہ اگر مذہبی جماعت کو احتجاج جاری رکھنا ہے، تو حکومت کراچی کے گراؤنڈز یا پریس کلب کے باہر تمام ضروری سہولتیں فراہم کرنے کے لیے تیار ہے تاکہ احتجاج کو پرامن طریقے سے منظم کیا جا سکے۔