جماعت اسلامی کے امیر حافظ نعیم الرحمن نے کہا کہ انہیں پی ٹی آئی کی جانب سے ہماری اے پی سی میں شرکت نہ کرنے کا افسوس ہے۔

جماعت اسلامی کے امیر حافظ نعیم الرحمان نے اسلام آباد میں غزہ ملین مارچ میں خطاب کرتے ہوئے کہا کہ اسرائیل کا وزیراعظم نیتن یاہو کھل کر یہ دعویٰ کر رہا ہے کہ وہ گریٹر اسرائیل چاہتے ہیں، جو کہ ایک تشویش ناک بیان ہے۔

حافظ نعیم الرحمان نے مزید کہا کہ حماس کی حمایت پوری امت مسلمہ پر فرض ہے اور جو لوگ حماس کو دہشت گرد کہتے ہیں، انہیں یاد رکھنا چاہیے کہ امریکہ خود دنیا کا سب سے بڑا دہشت گرد ہے۔

انہوں نے امریکہ کے متعلق گفتگو کرتے ہوئے کہا کہ امریکہ نے جاپان کے شہروں ناگاساکی اور ہیروشیما میں لاکھوں انسانوں کو قتل کر کے تاریخ کے بدترین جنگی جرائم کا ارتکاب کیا۔

حافظ نعیم الرحمان نے امریکہ کی دوغلی پالیسیوں کی شدید مذمت کرتے ہوئے کہا کہ وہ ہماری کمپنیوں پر پابندیاں لگا کر کھلی منافقت کا مظاہرہ کر رہا ہے۔

حافظ نعیم الرحمان نے گجرات میں مسلمانوں کے قاتل مودی کا دوست امریکہ کو تنقید کا نشانہ بناتے ہوئے کہا کہ اسرائیل کی نسل کشی کی کارروائیاں جاری ہیں اور اب تک 46 ہزار بے گناہ افراد کو شہید کیا جا چکا ہے۔

انہوں نے یہ بھی کہا کہ پاکستان میں پی ٹی آئی اور حکومت کے درمیان مذاکرات جاری ہیں، لیکن انہیں اس بات کا افسوس ہے کہ پی ٹی آئی نے جماعت اسلامی کی آل پارٹیز کانفرنس (اے پی سی) میں شرکت نہیں کی۔

حافظ نعیم الرحمان نے پی ٹی آئی کے بانی عمران خان سے مطالبہ کیا کہ وہ حماس کی حمایت کا اعلان کریں تاکہ اسرائیل کے ظلم کے خلاف پوری مسلم دنیا ایک جٹ ہو سکے۔

انہوں نے آخر میں کہا کہ اللہ نے ہمیں توفیق دی کہ ہم مظلوموں کے ساتھ کھڑے ہیں اور ہمیں یہ سمجھنا ہوگا کہ امریکہ اور اسرائیل کی مخالفت میں ہماری آواز کو بلند کرنا ہر مسلمان کا فرض ہے۔