پنجاب پولیس کے اسپیشل آپریشن سیل نے ایک اور بڑی کامیابی حاصل کرتے ہوئے قتل کے مقدمے میں مطلوب خطرناک اشتہاری ملزم حسنین احمد کو سعودی عرب سے گرفتار کر کے پاکستان منتقل کر دیا۔

ترجمان پنجاب پولیس کے مطابق، ملزم حسنین احمد سیالکوٹ پولیس کو قتل کے مقدمے میں مطلوب تھا۔ اس نے 2024 میں ذیشان نامی شہری کو فائرنگ کر کے قتل کیا تھا، جس کے بعد وہ سعودی عرب فرار ہو گیا تھا۔

تاہم، پنجاب پولیس نے اس کیس کا مسلسل فالو اپ جاری رکھا اور بالآخر کامیابی حاصل کرتے ہوئے انٹرپول اور ایف آئی اے کے تعاون سے ملزم کو گرفتار کر کے پاکستان منتقل کر دیا۔

یہ رواں سال کے صرف 16 دنوں میں تیسرا موقع ہے جب پنجاب پولیس نے کسی خطرناک اشتہاری کو بیرون ملک سے گرفتار کر کے وطن واپس لانے میں کامیابی حاصل کی ہے۔

انسپکٹر جنرل (آئی جی) پنجاب، ڈاکٹر عثمان انور نے اشتہاری کی گرفتاری پر ریجنل پولیس آفیسر (آر پی او) گوجرانوالہ اور پولیس ٹیم کو شاباش دی۔

انہوں نے اسپیشل آپریشن سیل کو ہدایت کی کہ وہ مزید اشتہاری مجرمان کی گرفتاری کے لیے کریک ڈاؤن تیز کریں تاکہ پنجاب میں امن و امان کو مزید یقینی بنایا جا سکے۔

آئی جی پنجاب نے مزید کہا کہ سنگین جرائم میں ملوث دیگر اشتہاری ملزمان کو بھی انٹرپول اور ایف آئی اے کے تعاون سے گرفتار کر کے جلد وطن واپس لایا جائے گا تاکہ انہیں قانون کے کٹہرے میں لایا جا سکے۔