وزیر اعظم شہباز شریف نے لاہور میں نوتعمیر شدہ قذافی کرکٹ اسٹیڈیم کا افتتاح کر دیا

وزیر اعظم پاکستان شہباز شریف نے لاہور میں نوتعمیر شدہ قذافی کرکٹ اسٹیڈیم کا باقاعدہ افتتاح کیا۔

افتتاحی تقریب میں وزیر اعلی پنجاب مریم نواز، اسپیکر قومی اسمبلی ایاز صادق، اسپیکر پنجاب اسمبلی، اراکین اسمبلی، اور پاکستان کرکٹ ٹیم کے کھلاڑیوں اور مینجمنٹ نے بھی شرکت کی۔

وزیر اعظم شہباز شریف نے اسٹیڈیم کی تعمیر میں حصہ لینے والے مختلف محکموں کے افسران کو شیلڈز دیں اور کہا کہ “یہ دن سب کے لیے خوشی کا ہے، محسن نقوی کی قیادت میں ہم نے ناممکن کو ممکن کر دکھایا ہے۔” انہوں نے اسٹیڈیم کی تعمیر نو کے عمل میں شریک تمام افراد کی محنت کو سراہا اور محسن نقوی کو شاندار کام پر خراج تحسین پیش کیا۔

اسپیکر قومی اسمبلی ایاز صادق نے اسٹیڈیم کی تزئین و آرائش دیکھ کر خوشی کا اظہار کیا اور کہا کہ “ہارجیت کھیل کا حصہ ہے، کھلاڑیوں کو بھرپور سپورٹ کرنا چاہیے۔” انہوں نے چیمپئنز ٹرافی میں کھلاڑیوں کی بہتر کارکردگی کے لیے امید کا اظہار کیا۔

چیئرمین پی سی بی محسن نقوی نے اس موقع پر کہا کہ “اسٹیڈیم کی تعمیر نو کے منصوبے کو مکمل کرنے میں 2500 مزدوروں نے دن رات محنت کی۔ پنجاب حکومت، نیسپاک اور ایف ڈبلیو او نے اس منصوبے کو تکمیل تک پہنچانے میں اہم کردار ادا کیا۔” انہوں نے اس بات کا عزم ظاہر کیا کہ “ہم سب مل کر ٹورنامنٹ کو کامیاب بنائیں گے۔”

وزیر اعظم شہباز شریف نے اسٹیڈیم کی تعمیر نو کی کامیابی پر اظہار مسرت کرتے ہوئے کہا کہ “قذافی اسٹیڈیم کی تزئین و آرائش ایک شاندار طریقے سے مکمل ہوئی ہے اور 30 سال بعد پاکستان میں ایک بڑا ٹورنامنٹ ہونے جا رہا ہے۔” انہوں نے مزید کہا کہ “چیمپئنز ٹرافی میں ہم اپنے ہمسایہ کو شکست دے کر عوام کے دل جیتیں گے، اور میں انتظار کر رہا ہوں جب ہمارے کھلاڑی بھارت کو شکست دیں گے۔”

وزیر اعظم نے اپنے خطاب کے آخر میں کہا کہ “ہم سب چیمپئنز ٹرافی میں ٹیم کی کامیابی کے لیے دعا گو ہیں، اور امید ہے کہ کھلاڑی قوم کو خوشی کا تحفہ دیں گے۔”