ورلڈ کرکٹرز ایسوسی ایشن (ڈبلیو سی اے) نے آئی سی سی ریونیو کی غیر منصفانہ تقسیم کے خلاف آواز اٹھاتے ہوئے کرکٹ شیڈول اور معیشت میں اصلاحات کے لیے جامع تجاویز پیش کی ہیں۔

رپورٹ کے مطابق، عالمی کرکٹ کا 83 فیصد ریونیو صرف تین ممالک میں تقسیم ہوتا ہے، جبکہ دیگر ممالک کو انتہائی محدود حصہ ملتا ہے۔

ایسوسی ایشن نے مطالبہ کیا ہے کہ بھارتی کرکٹ بورڈ کا حصہ 38.5 فیصد سے کم کرکے 10 فیصد تک محدود کیا جائے اور ٹاپ 24 ممالک کو کم از کم 2 فیصد جبکہ زیادہ سے زیادہ 10 فیصد حصہ دیا جائے۔

ڈبلیو سی اے نے کرکٹ شیڈول میں بہتری کے لیے سال میں چار الگ ونڈوز مختص کرنے، تمام باہمی سیریز کو سینٹرل کنٹرول میں لانے اور پلیئرز کو ٹی 20 لیگز اور آئی سی سی ریونیو میں زیادہ حصہ دینے کی تجویز دی ہے۔

ایسوسی ایشن نے ایک گلوبل گیم لیڈر شپ کمیٹی کے قیام کی بھی سفارش کی ہے، جو کرکٹ بورڈز، ٹی 20 لیگز، فرنچائزز اور پلیئرز کے درمیان توازن قائم کرتے ہوئے آئی سی سی کو ایک جدید گورننگ باڈی میں تبدیل کرے گی۔