مقبوضہ جموں و کشمیر کے حریت رہنما یاسین ملک کی اہلیہ مشعال ملک نے اسلام آباد میں پریس کانفرنس کرتے ہوئے کہا ہے کہ اب وقت آگیا ہے کہ پاکستان کو شملہ معاہدہ معطل کرنے کا اعلان کرنا چاہیے۔

مشعال ملک نے کہا کہ مقبوضہ کشمیر کی فیملیز کو جدا کیا جارہا ہے، ان خاندانوں کا مقدمہ عالمی سطح پر لیجانے کی ضرورت ہے، میں خود اقوام متحدہ کو خاندانوں کے جدا کرنے کے حوالے سے خط لکھوں گی۔

انھوں نے کہا کہ بھارت دو طرفہ اور کثیر الجہتی معاہدے معطل کرچکا ہے، امکان ہے کہ بھارت آزاد کشمیر میں جعفر ایکسپریس کی طرح کا حملہ کرسکتا ہے۔

مشعال ملک نے کہا کہ مقبوضہ کشمیر میں جنگل کا قانون ہے اور اسرائیلی فورسز وہاں آچکی ہیں، کشمیریوں کو گرفتار اور شہید کیا جارہا ہے، بھارتی حکومت کسی کو بھی رعایت دینے کیلئے تیار نہیں ہے۔

انھوں نے کہا کہ بھارت کی آرمی، ایئر فورس اور نیوی نے ہاتھ کھڑے کردیئے ہیں، مقبوضہ کشمیر کے حریت رہنما جو جیلوں میں بند ہیں ان پر ظلم کیا جارہا ہے، بھارتی فوج کو خوف ہے کہ اس کا ردعمل آسکتا ہے۔

پاکستان کی سفارتی کامیابیوں پر بات کرتے ہوئے مشعال ملک نے کہا کہ چین نے پاکستان کے ساتھ کھڑے ہونے کا اعلان کیا ہے، بنگلہ دیش نے بھارت کو منہ توڑ جواب دیا ہے، اس وقت ہمیں چاہیے کہ پاک فوج کا بھرپور ساتھ دیں۔

ان کا کہنا تھا کہ ہندوستان نے جنگ کا اعلان کر رکھا ہے، جنگوں میں کوئی فاتح نہیں ہوتا، ہمیں اپنی فورسز پر فخر ہے، ہمیں سوشل میڈیا استعمال کرتے ہوئے احتیاط برتنے کی ضرورت ہے۔