بھارت کی بزدلانہ جارحیت نے پوری قوم کو ایک لڑی میں پرو کر متحد کردیا ہے اور پاکستانی قوم دفاع وطن کے لیے اپنے خون کا آخری قطرہ تک بہانے کے لیے تیار ہے، قوم امن چاہتی ہے، لیکن توقع رکھتی ہےکہ بھارتی جارحیت کی صورت میں منہ توڑ جواب دیا جائے۔

گیلپ پاکستان کی جانب سے کیے گئے تازہ ترین سروے میں 72 فیصد پاکستانیوں نے جنگ پر امن کو ترجیح دیتے ہوئے جنگ سے گریز کا مشورہ دیا، لیکن جنگ مسلط ہونے کی صورت میں 93 فیصد پاکستانیوں نے وطن کے دفاع کے لیے خون کا آخری قطرہ تک بہادینے کے عزم کا اظہار کیا ہے۔

چند گھنٹوں قبل ڈائریکٹر جنرل آئی ایس پی آر لیفٹیننٹ جنرل احمد شریف چوہدری نے نیوز بریفنگ دیتے ہوئے کہا کہ7 اور 8 مئی کی شب بھارت نے ایک بار پھر جارحیت کی کوشش کی، تاہم پاکستانی مسلح افواج پوری طرح چوکس ہیں۔

انہوں نے بتایا کہ بھارت نے مختلف شہروں میں ڈرونز کے ذریعے دراندازی کی کوشش کی، لاہور کے قریب ایک ڈرون حملے میں پاک فوج کے 4 جوان زخمی ہوئے جبکہ میانوسندھ میں بھارتی ڈرون کی کارروائی میں 1 شہری شہید اور 1 زخمی ہوا۔

ڈی جی آئی ایس پی آر کے مطابق لائن آف کنٹرول پر دشمن کو بھاری نقصان پہنچایا گیا اور بھارت کے 12 ڈرونز کو مختلف مقامات پر مار گرایا گیا، عالمی برادری بھارت کی اشتعال انگیزی کی گواہ ہے۔