بنگلہ دیش کی کرکٹ ٹیم شیڈول کے مطابق پاکستان کا دورہ کرے گی، پاک بھارت جنگ سے شیڈول پر کسی قسم کا کوئی فرق نہیں پڑے گا، میچز شیڈول کے مطابق فیصل آباد اور لاہور میں ہی کھیلے جائیں گے۔

ذرائع کا کہنا ہے کہ پاک بھارت جنگ بندی کے بعد سیکیورٹی صورتحال معمول پر آتی جارہی ہے، جس کے مدنظر پاک بنگلہ دیش سیریز کو شیڈول کے مطابق منعقد کرنے کا فیصلہ کیا گیا ہے۔

بنگلہ دیش کرکٹ ٹیم کا دورۂ پاکستان 25 مئی سے 3 جون 2025 تک شیڈول ہے، جس میں پانچ ٹی20 انٹرنیشنل میچز شامل ہیں۔ تاہم، حالیہ دنوں میں سیکیورٹی خدشات کے باعث اس دورے کے حوالے سے غیر یقینی صورتحال پیدا ہوئی ہے۔

شیڈول کے مطابق پاک بنگلہ دونوں ممالک کی ٹیمیں 2 میچز اقبال اسٹیڈیم فیصل آباد جبکہ 3 میچز قذافی اسٹیڈیم لاہور میں کھیلیں گی، تمام میچز پاکستانی وقت کے مطابق شام 8 بجے شروع ہوں گے۔

بنگلہ دیشی ٹیم 21 مئی کو پاکستان پہنچنے کی منصوبہ بندی کر رہی ہے، اس سے قبل وہ 17 اور 19 مئی کو شارجہ میں متحدہ عرب امارات کے خلاف دو ٹی20 میچز کھیلیں گے۔