وزیراعظم شہباز شریف نے کہاہے کہ 1971 کی جنگ کا بدلہ لے لیا،پاک بھارت جنگ کسی بھی لمحے انتہائی خطرناک رخ اختیار کرسکتی ہے، جنگ  کے نتائج انتہائی خطرناک ہوسکتے ہیں۔

شہبازشریف نے پہلگام واقعے کوافسوسناک قراردیتے ہوئے کہاکہ بھارت نے پاکستان کےخلاف بےبنیاد الزامات کی بوچھاڑکی،ہم نے اعلان کیا تھاکہ پہلگام واقعہ کی عالمی تحقیقات کیلئےتیارہیں۔

وزیراعظم شہبازشریف نے کہاکہ بھارت کو یہ بات ہضم نہیں ہوئی اورپاکستان پرحملہ کردیا، بھارتی حملےمیں33 افراد شہید اور55زخمی ہوئے،پاکستان نے بھارت کے نہتے شہریوں کو نشانہ نہیں بنایا۔

یہ بات انہوں نے مظفر آباد میں ایک تقریب سے خطاب کرتے ہوئے کہی ۔انہوں نے کہاکہ بھارت کے6جہازگرائے جس پرانہیں بڑا ناز تھا،پاکستان کےدفاع کا حق استعمال کرتےہوئے یہ بھارتی طیارے گرائے۔

ان کاکہناتھاکہ 9مئی کوفیصلہ ہوااپناحق استعمال کریں گےاوردشمن پرحملہ کریں گے،بھارت کےخلاف جوابی کارروائی سےپہلےسپہ سالارسےبات ہوئی،سپہ سالارکی آوازمیں بلاکااعتماد،جوش اور ولولہ تھا۔

شہبازشریف نے کہاکہ فیصلہ کیا بھارت کو ایسا تھپڑرسید کیاجائے جو تا قیامت نہ بھولے، مسلح افواج نےمعرکہ حق میں بھارت کو چھٹی کادودھ یاددلایا، دفاع کاحق استعمال کرتےہوئے بھارت کےخلاف نپی تلی جوابی کارروائی کی گئی۔

وزیراعظم کاکہناتھاکہ ہمارےنیوکلیئرہتھیاروں کی دوردورتک ضرورت نہیں پڑی،امیدہے نیوکلیئرہتھیاروں کی ضرورت نہیں پڑے گی۔

شہبازشریف نے کہاکہ فیلڈمارشل عاصم منیرکی دلیرانہ قوت نےکامیابیاں دلائیں،  سپہ سالارنے فرنٹ لائن سے لیڈ کیا، پاکستان نے1971کی جنگ کا بدلہ لےلیا۔

انہوں نے کہاکہ اسی اتفاق اوراتحاد کی طاقت سےمعاشی ترقی کاسفرطےکرناہے،عاصم منیرکوقوم نے فیلڈمارشل کاٹائٹل عطافرمایا،اتحادسےچلیں تودشمن میلی آنکھ سےدیکھنےکی جرأت نہیں کرسکےگا۔

وزیراعظم کا مزید کہناتھاکہ آئی ایم ایف وفد پاکستان کی تعریف کررہا ہے،شبانہ روزمحنت سےپاکستان کومعاشی طورپرمستحکم بنارہےہیں،شہداکی قربانیوں کاکوئی نعم البدل نہیں،لواحقین کےمعاشی مسائل کاحل ضروری ہے۔