2 ایٹمی طاقتوں پاکستان اور بھارت کے درمیان تیزی سے بڑھتی ہوئی کشیدگی پر اقوام عالم کی تشویش بڑھ رہی ہے، برطانیہ اور جرمنی نے صورتحال پر تشویش کا اظہار کرتے ہوئے دونوں ممالک کو تحمل کا مظاہرہ کرنے کا مشورہ دیا ہے۔

برطانیہ کے وزیراعظم کیئر اسٹارمر نے  کشیدگی میں کمی کیلئے بھارت اور پاکستان کو بات چیت کا مشورہ دیا ہے۔برطانوی وزیر خارجہ نے دونوں ملکوں سے تحمل کا مظاہرہ کرنے اور براہ راست بات چیت شروع کرکے سفارتی حل نکالنے پر زور دیا ہے۔

 برٹش پاکستانی اراکین پارلیمنٹ ناز شاہ، طاہر علی، ایوب خان،یاسمین قریشی اور عمران حسین سمیت کئی اراکین   نے دوران خطاب  زور دیا کہ پاکستان اور بھارت کے درمیان کشیدگی مستقل ختم کرنے کیلئے برطانوی حکومت مسئلہ کشمیر حل کرائے۔

یہ بھی پڑھیں: دونوں ملکوں کے درمیان ڈائیلاگ ممکن بنانے کے لیے امریکا کو مزید اقدامات کرنے چاہیے، امریکی اخبار 

ادھر یورپی یونین نے  پاک بھارت کشیدگی میں فوری کمی کے اقدامات کرنے کا مطالبہ کردیا اور  یورپی یونین خارجہ پالیسی سربراہ نے کہا ہے کہ یورپی یونین کشیدگی میں کمی اور ثالثی کی کوششیں کررہی ہے۔

جرمنی کے چانسلر فریڈرش مرز نے  پاکستان اور بھارت کے درمیان کشیدگی پر شدید تشویش کا اظہار کیا ہے جب کہ فرانس  نے پاکستان اور بھارت سے تحمل کا مظاہرہ کرنے کا مطالبہ کیا ہے۔

روسی وزارتِ خارجہ نے کشیدگی کو پُرامن اور سفارتی طریقوں سے حل کیے جانے کی امید کا اظہار کیا ہے۔