پاکستان کے معروف جیولن تھرو اسٹار اور اولمپک گولڈ میڈلسٹ ارشد ندیم نے ایک مرتبہ پھر عالمی سطح پر اپنی صلاحیتوں کا لوہا منواتے ہوئے ایشین ایتھلیٹکس چیمپئن شپ 2025 کے فائنل کے لیے کوالیفائی کر لیا ہے۔

جنوبی کوریا کے شہر گومی میں جاری چیمپئن شپ کے کوالیفائنگ راؤنڈ میں ارشد ندیم نے گروپ اے میں شرکت کی، جہاں انہوں نے صرف ایک ہی تھرو میں 86.34 میٹر کی غیرمعمولی پرفارمنس کا مظاہرہ کرتے ہوئے فائنل مرحلے میں رسائی حاصل کرلی۔

یہ تھرو نہ صرف کوالیفائنگ راؤنڈ کی سب سے طویل تھرو ثابت ہوئی بلکہ انہیں ایونٹ کے مضبوط ترین امیدواروں میں بھی شامل کر دیا۔

مزید پڑھیں: پیرس اولمپکس: ارشد ندیم نے 40 سال بعد پاکستان کو اولمپکس میں گولڈ میڈل جتوادیا

دوسری جانب بھارت کے جیولن تھرو ایتھلیٹ یش نے اپنی ابتدائی کوشش میں 76.67 میٹر کی تھرو کی، جو ارشد کی تھرو سے نمایاں طور پر کم رہی۔

ارشد ندیم کی حالیہ کارکردگی ان کی فٹنس، مہارت اور ذہنی مضبوطی کا منہ بولتا ثبوت ہے۔ ان کی تکنیکی برتری اور میدان میں بھرپور اعتماد نے انہیں ایک مرتبہ پھر خبروں کا مرکز بنا دیا ہے۔

یہ بات قابل ذکر ہے کہ ارشد ندیم نے پیرس اولمپکس 2024 میں 92.97 میٹر کی تاریخی تھرو کے ساتھ نہ صرف گولڈ میڈل جیتا تھا بلکہ اولمپک ریکارڈ بھی قائم کیا تھا، جو ان کے کیریئر کی اب تک کی بہترین کارکردگی شمار کی جاتی ہے۔