لائن آف کنٹرول (ایل او سی) پر بھارتی فوج کی بلااشتعال گولہ باری کا سلسلہ بدستور جاری ہے، جس کے نتیجے میں آزاد کشمیر کی تحصیل ہجیرہ اور عباس پور کے علاقوں میں متعدد نہتے اور معصوم شہری شدید زخمی ہو گئے ہیں۔

سکیورٹی ذرائع کے مطابق بھارتی جارحیت کے باعث کئی مکانات کو بھی شدید نقصان پہنچا ہے۔

تحصیل ہجیرہ میں بھارتی فوج کی شیلنگ سے متاثرہ محمد رفیق کے بھتیجے نے بتایا کہ ان کے چچا رات کی شدید گولہ باری کے دوران زخمی ہو گئے۔

بھتیجے کا مزید کہنا تھا کہ میرے چچا کی ٹانگ دو جگہ سے فریکچر ہو چکی ہے، مگر ہمارے حوصلے بلند ہیں اور انشاءاللہ ہم مقابلہ کریں گے۔

مزید پڑھیں : طویل ترین پاک بھارت فضائی جھڑپ، دنیا بھر کی افواج کی توجہ کا مرکز

ایک اور زخمی شہری معاویہ نواز نے بتایا کہ بھارتی فوج کی جانب سے فائر کیا گیا شیل ان کی ٹانگ پر لگا، جس سے وہ ضائع ہو گئی۔ ان کا کہنا تھا کہ بھارت کی بلااشتعال فائرنگ سے کئی گاؤں متاثر ہوئے ہیں اور بعض افراد شہید بھی ہوئے ہیں۔

عباس پور کے علاقے لاسری منگ میں بھارتی شیلنگ سے متعدد مکانات تباہ ہوئے، تاہم سکیورٹی ذرائع نے بتایا کہ اس علاقے میں کسی قسم کا جانی نقصان رپورٹ نہیں ہوا۔

مقامی شہریوں نے بھارتی جارحیت کے باوجود اپنے بلند حوصلے کا اظہار کرتے ہوئے کہا کہ وہ ہر محاذ پر دشمن کا مقابلہ کریں گے۔

دفاعی ماہرین کے مطابق بھارتی فوج کی جانب سے شہری آبادی کو نشانہ بنانا بین الاقوامی قوانین اور جنگی اصولوں کی کھلی خلاف ورزی ہے۔

ماہرین کا کہنا ہے کہ بھارت آزاد کشمیر کے نہتے شہریوں پر گولہ باری کر کے پاکستان کی جانب سے ملنے والی عسکری ہزیمت کو مٹانے کی ناکام کوشش کر رہا ہے۔